John Lennon kou jung ka sen 12,000 yokzüktsü imlar

John Lennon's hairFebruary 10, 2016: Taoba mapang kentener telok ‘Beatles’ züngsem John Lennon ‘How I Won the War’ film tangoktsü lia pa indang kou jung ka mejepzüka liasü, aser iba kou ji tan ita tatemlen US, Dallas nung auction asüba mapang US sen 12,000 yokzüktsü imlar, ta osang ka ajanga ashi.

1966 küm September ita nung comedy film, ‘How I Won the War’ tangoktsü lia Germany nunger hairdresser, Klaus Baruck-i Lennon indang kou jung ka mejepzüka liasü.

Dallas nung Heritage auctioneers-i iba kou jungji tuluka aser angji kou noklang aika lir. Auction ka nung Lennon indang koujung tulutiba ayokbaji ya asütsü, aser iba kou ya original kibur ket nung küm 50 jungnüa yua liasü.

‘Beatles’ telok            pur indang kensep ‘Revolver’ sayaba sülen ita ka dang lirbo Lennon indang kuji mejepzüka liasü.

Iba mapang nungji osangkaket ana nung Baruck-i Lennon kou mejepzüka noksa adoka liasü.

Iba auction ya February 20 nü tembangtsü aser kasa auction nung ‘Please Please Me’ LP ka aser Beatles telokpur Yesterday & Today kensep densema par telok indang nüngo oset aika yokshitsü.

Yaküm November ita nunga Beverly Hills nung Lennon indang guitar ka US sen million 2.4 agi yokdoka liasü. Lennon indang Gibson acoustic guitar ji 1963 küm December ita Khristmas concert mapang nung nisung kari auyaa liasü.

You must be logged in to post a comment Login