Johnny Depp aser Amber Heard na balatsü ken o tembangogo

January 14, 2017 (Agencies): Johnny Deep aser Amber Heard na balatsüba nung ken o ajak tempangogo. Ita 5 tejakdang senotsü dak sendakba ken o tembo ajak tempanger liasü.
Yaküm May ita Heard-i Pirates of the Caribbean actor den kibong kümer ita 18buba nung balatsü telemtetba agi.
Iba balaba nung senotsü dak sendakba ken o nung Deep-i Heard nem sen million $7 agütsütsü lemtet. Iba sen ya Heard-i charity nem agütsütsü nangzük. Hokolbarnü iba telemtetba agidang tena indang azü ana, Pistol aser Boo na Heard-i anepalutsü asoshi la nem temelaba agütsü.
Osang ka ajanga ashiba agi, tena alidang ki aser osettsüset Deep nem agütsü, koba nung L.A., Colorado, Kentucky, Bahamas aser France nung aliba ali aser ki tem dena lir.
Iba den külemi gari balala, motorcycles, rong, golf carts aser gari, item ajak senteper gari 40 shi pa nem agütsü.
“Deep’er kibong asoshi iba jangramatem otsü toktsütetba atema onok ajak kanga pelar,” ta Depp’er lawyer Laura Wasser-i ashiba osang ajanga metetdaktsü.
“Iba ya kanga anogo tajung ka lir. Amber-i aginüba ajak agi balatsübaji dang liasü, aser tanü aji atalokogo,” ta Pierce O’Donnell, Heard indang lawyer-i osangbenertem dang ashi.
Heard aser deep na prongla legal fees tena sasa agütsütsü court-i tetuyuba agutsü. Iba balaba dak sendakba ken o lokti nung mejembitsü asoshi maneni tena nem ozüng agütsü.