Johnny Depp-i Trump tepsettsü jembiba o atema tatok meshi

Los Angeles, June 25 (Agencies): Hollywood star Johnny Depp-i asayamenüa US Tir, Donald Trump tepsettsü indang o jembiba atema tatok meshiogo.
Arishi küm 54 actor Depp-i, pai jembiba oji inyaktsü bilema aliba o ka masü saka asayamenüa jembiba o ka lir, ta ashi.
“Yasüng ni Tir Trump indang jembiba oji asayamenüba o ka liasü, aser ni iba atema tatok meshir. Ibaji inyaktsü bilemba o ka masü, mesüra tesempa o ka masü. Ni iba oji kar mulung yirutsütsü atema masü saka asayamenüa jembiba dang lir,” ta Depp-i sangdong ka nung metetdaktsü.
1865 küm John Wilkes Booth-i taoba US Tir, Abraham Lincoln tepsetba dak sendakba o ka mesüka Depp-i, “Actor kati tesüsa Tir tepsetbato kodang? Ni iba atema temsüa kümner. Ni actor ka masü. Taküm alitsü atema ni yazü jembir. Ajisüaka joko mapang tatsüka bilema arudar, aser tang ya mapang tongogo ta bilemer,” ta jembia liasü.
Pai jembiba oji kanga kara prokshiba sülen White House-i sangdong ka ajanga Deep-i jembiba oji kanga sashia aitsü aser Hollywood nung tangartem danga ibaji aitsütsüla, ta sangokja liasü.