Joko Bangladesh nung India telungpur kümzüka mali: BSF

New Delhi/Shillong, May 06 (Agencies): Border Security Force (BSF) Director General, K K Sharma-i, joko Bangladesh nung India nunger telungpur teloktem kümzüka mali, ta metetdaktsü.
Hokolbarnü Shillong nung aliba BSF (Meghalaya Frontier) headquarters nung sentong ka tembangba sülen osangbenertem den jembidang Sharma-i, “Joko Bangladesh nung parnok (India nunger telungpur) yakyaka mali. India nunger telungpur indang training camp aser parnok atsükdak tesem kar lir, aser onok (BSF) osang ajanga ashiba agi, BGB (Border Guards of Bangladesh)-i itemji raksatsüogo,” ta ashi.
Bangladesh nunger litsü nung India nunger telungpur teloktem indang camp lira Bangladesh security sepaitemi itemji raksatsütsü, ta paisa ashi.
India aser Bangladesh na tsüngda arrtsü kilometer 1,880 lir aser item arrtsü tesemji India kübok state pezü- Tripura (kilometer 856), Assam (kilometer 263), Meghalaya (km 443) aser Mizoram (km 318) nung lir.
India-Bangladesh arrtsü adena ozüng alema kiset-shiruru shibelenba tebilemtsü dak sendakba nung Sharma-i, item mapatem nokdangtsü atema BSF sepaitemi akokba tashi mera ajak agia inyaktsü, ta metetdaktsü.
“Joko mapang talangka arrtsülen linük anaprong nungi nisungtemi item mapaji inyaka arur. Kodang onoki kanga mita inyakdir shiruru shibelenbaji anener, aser parnoki tanga tesem ka nung inyaker. Ibayongji onoki meranga inyakaka ibaji ajanga iba mapa ya khenyongibo menokdangteter,” ta paisa ashi.
Sharma-i, BSF-i technology teyaritem agia India-Bangladesh arrtsü nung ozüng alema inyakba mapatem nokdangtsü, ta ashi.
“Kobi melii onoki intruder detection alarm system inoktsü,” ta paisa metetdaktsü.