Joko Trump dang melangzütsü: Clinton

Washington, October 23 (Agencies) : US Democratic party nungi Tir menden atema toktepla, Hillary Clinton-i, Republican party nungi la den toktepsang, Donald Trump nem telangzüba kecha magütsütsü saka November 8, 2016 nü agitsü aliba Tir election atema bendanga agüja inyaktsü lemtetogo.
“Ni Trump-i asüngdangbatem langzütsü bilema-a mali,” ta Honibarnü la Pittsburgh nungi Philadelphia-i aoba mapang Pennsylvania nung anena nübuyimdang osangbenertem den jembiba mapang Clinton-i ashi.
Democratic party nungi tang Trump tang vote timba nguteta alila, Clinton-i, ni kü den toktepsang den gondha pezü ser tesadang o toktep sentong nung shilem agiatokogo, ta ashi.
“küna rongnung shiba shimtsü, iba telemtetba agitsü atema America nem bendanga yutsür. Anungji pai tang kechisa shinerar shitakjang,” ta Clinton-i ashiba Efe osang ajanga metetdaktsü.
Clinton ji osangbenertemi kanga sapur aser election koba südir süaka renematoker alir ta Trump-i jembia lir.
Ni Tir shim nungbo Clinton Secretary of State inyakba mapang official email tem yoktsü atema lai meyong server amshiba bushisüngdangtsü, aser ibaji ajanga la tepuokdakia aitsü akok, ta Trump-i mapang aika nung shiogo
Taoba hopta Las Vegas nung Trump aser Clinton na tatembang buba otoktep sentong akaba mapang pai Clinton ji memerüktet tetsür ka lir ta ashi.
Tesüiba mapang first lady, Clinton-i, “Trump-i pa nübuyim sentongji pai kechi koma bilemer yamaji agitsü akok, ajisüaka nibo Democrats teinyaktsü kechi ibaji lemsateper,” ta ashi.
La Honibarnü Pennsylvania sema nübuyima jajaba mapang la den yariteper Tim Kaine-i meina liasü.