Jolie aser Pitt na Child custody ken o bentetogo

Luchii/December 2, 2018 (Agencies): Hollywood nung nüngtugu actor Angelina Jolie aser Brad Pitt na balaba sülen tena tanur trok custody dak sendakba nung küm ana dak tema mangatettep adoka arur tang bentetogo, ta Jolie indang lawyer-i Rogonü ashi. “Custody arrangement ka taoba hopta mulunga agizükogo aser anatsülen nungi judge-i sign süogo,” ta Jolie indang lawyer Samantha Bley DeJean-i ashi.
“Iba telemtetba, koba child custody evaluator tetuyuba nung amendaker agi, iba atema okadaki aotsü nüngdak madoker. Tanurtem mechi iba telemtetba idang osang tejangja magütsütsü,” ta DeJean-isa ashi.
Jolie aser Pitt na ya mapang ka nungbo Hollywood nung ajaki nükshia liasü. Tena küm ter tema medema aru aser küm ana tashi kibong kümer aliba mapang 2016, Rongjui/Sept nung bala. Jolie shibai tena tsüngda mangatettep aliba ajanga balatsü asoshi ken o benok, lai tanur trokprongla primary custody aginer. Tanur trok rongnung tena chir asem aser adopt asüba tanur asem lir.
Rogonü sangdong nung custody koma inyaksangshitsü ajibo memetetdaktsü aser Jolie otongdar-i osang tejangja agütsütsü nongnanga liasü. Custody ken o dak sendakba nung Luchii/Dec 4 nü Los Angeles nung private judge ka matsüngdang obendangtsü lateter liasü. Jolie den sendaktepa aliba osang ka ajanga ashiba agi, la iba ken o toktsür taküm nung jenjang tasen agiyonga aotsü kanga pelar.
Pitt aser Jolie na 2005 nungi medem tenzük aser 2014 küm kibong aküm. Tena jala jabaso; Maddox, 17, Pax, 15, Zahara, 13, Shiloh, 12, aser arishi küm10 jakrep Knox aser Vivienne na lir.