Jorhat nung AGP züngsemtemi lennir 3 anema lungkak ait

Jorhat, March 15 (Agencies): Hokolbarnü Jorhat nung AGP party züngsemtemi parnok lennirtem Keshab Mahanta, Phani Bhusan Choudhury aser Atul Bora nunger noksatem rongdoktsü aser party office nung banner aser poster tem raksatsü.
Taruba Lok Sabha elections nung BJP den yariteptsü lemtetba anema parnoki lennir asem anema lungkak ait.
Iba telemtetba ya magizüker aser iba ajanga party indang regional tamaitsü raksatsü ta Jorhat nung AGP lennirtemi ashi.
“Keshab Mahanta, Phani Bhusan Choudhury aser Atul Bora nungertemi telemtetba agiba ajanga nübortem nem osang tai sangoktsür. AGP-i Assam nunger maitsü kümzüka ayur ta nübortemi bilemer saka BJP den tesentaktep yangluba ajanga iba tangatetba agientsür. BJP-i Citizenship Amendment Bill 2016 ajanga Assam nung Hindu Bangladeshi nunger nem senso agütsütsü anema onoki noktaker” ta AGP central committee executive züngsem Niren Sharma-i ashi.
Lennir asemji tashi aser sen angutsü atema dang inyaker. CAB anema BJP-i aniba sorkar nung madentsü lemtetba sülen par asemi tanaben BJP den tesentaktep yangluba ajanga party tenüng menüktsür aser timtem bentsür arutsü, ta AGP lennir kati ashi.
Tanü Old Circuit House Road anasa aliba AGP office nung züngsem 100 dak tema adenshi aser lennir asem indang noksatem rongdok.
Bangladesh nungi ozüng alema arur meindoktsü atema küm trok tashi agiba Assam Agitation sülen Asom Gana Parishad (AGP) ya tentet. Prafulla Kumar Mahanta lenisüba kübok parnoki kümsük anaben tashi sorkar yimsü asü saka terenlok mapa balala meinyaktetba den ozüng alema arurtem memeindoktet.
Tarun Gogoi lenisüba kübok 2001 nungi Congress-i kümsük asemben tashi sorkar yimsü masüdang AGP-i sorkar ketdangsüba mapang ochimashi aser ashishitep ken o aika adok.
2014 aser 2016 nung AGP-i BJP den yaritepa party asentenshitsü merang.