Jorhat nung kinü tanurtem asüba atema bushisüngdang asütsü tuyu

Jorhat, Yimpoksüi (November) 14 (Agencies): November 1 nungi 6 tsüngda Jorhat Medical College and Hospital nung kinü tanur 15 tashi asüba atema Deputy commissioner Narayan Konwar-i magisterial enquiry ka asütsü tuyuogo.
Dispur nungi Principal Secretary, Health and Family Welfare, Samir Kumar Sinha lenisüba kübok kanga temaba jenjang indang luden kati Jorhat tonga arua bushisüngdangba sülen osang sangoktsüba nung ajemdaker iba tetuyuba agütsür, ta Konwar-i ashi.
“Bushisüngdangertemi report nung metokmeperi kar ajitet aser iba jagi magisterial enquiry ka asütsü ashi. Doctor temi mpa shitak meinyakba kar alitsü akok” ta DC-isa ashi.
“Magisterial enquiry ya tai tongloktsütsü atema masü saka tarutsü atema temetongshitsütem metettsü atema lir” ta Konwar-isa shisem.
JMCH-i parnok sasa bushisüngdangba nung tanur asotsü aliba tetsütemi taoba mapang check up asüba report tem maliasü aser kinü tanurtem touzük kanga ajema aso ta ashir. Anungji iba atema National Health Mission kübok Accredited Social Health Activists dak tai tongloktsütsü asü ta osangbenertemi asüngdangdang “report nung ibaji shia mali saka meyiper ASHA worker temi ang doctor tem mapa inyaka maruba indang ang shia lir” ta Konwar-i langzü.
Tetsütem nem NHM kit agütsübaji tamajung liasü aser mozütem nung bacteria aliba bushitetba atema telok kati Jorhat police station nung ken o benoka aliba atema osnag metetnüa asüngdangdang “iba kuliji mali” ta deputy commissioner-isa langzü.
November 7 aser 8 anogotem kinü tanur 3 aser ano November 12 nü ana asüba züngsema tang tashi nung kinü tanur 20 tashi süogo.
November 6 nü head of department, Paediatrics Professor Pranabjit Biswanath lenisüba kübok züngsem 6 agi akümba telok ka JMCH Superintendent Saurabh Borkotoky-i tentettsü aser bushisüngdang asütsü tuyu. Parnoki iba tasüngji bushitetba osang agütsü.
Iba sülen, November 8 nü Medical Education Director Anup Barman-i aniba teshimtet telok kati bushisüngdang asüba osangji agizük aser SCNU nung yipten, staff aser osettsüset teimba akümtsü atema tebilembatem lemsatep.
Iba telok nung executive director NHM Achyut C Baishya, commissioner and secretary Anurag Goel, aser director of Health Services Rathin Bhuyan nungertem dena liasü.