Jorhat nung mim aketba yi ayoker 2 apu

Jorhat, February 25 (Agencies): Assam kübok Jorhat nung yi nung mim jemsemer nisungtem asüba ken o atema tongti süa tai tonglokja alirtem puogo.
Tenaji Jitu Sonowal aser Sunil Baruah na lir aser tenati Titabor Sub-Division kübok Bajalikota nung mim aketba yi ayok. Tena Deobar aonung Baksa nung apu.
Iba ken o dak sendakba nung Gorajan Mishing gaon nungi apurtemji Ramesh Tayed (48 yrs), Dilip Norah (48 yrs) aser Bholaram Paying (40 yrs) nungertem lir, ta Jorhat SP Vaibhav Nimbalkar-i ashi,
Maneni, police-isa Rupa Bora Kachari, (70 yrs), Puhiti Chutia (50 yrs), Lakhu Rai (33 yrs), Jitu Sonowal (34 yrs) aser Sunil Baruah (41 yrs) nungertem pua lir. Parnok ajak ya Borholla police station telongtet kübok alirtem lir.
February 1 nungi tenzüker Deobar tashi nung Jorhat district kübok ozüng alema yangluba yi litre 241000 tashi raksa endokogo, ta Nimbalkar-isa metetdaktsü.
District administration-i ashiba agi tang tashi nung Jorhat district nungi nisung 59 (tebur 43 aser tetsür 16) süogo.
JMCH nung Golaghat district nungi nisung 39 asü. Tang mozü kidang anepalua arur nisung 247 (tebur 220, tetsür 27) nungi parnok tibo kanga majung lir, ta ketdangsertemisa ashi.
Hombarnü Titabor sub-division kübok Borholla nung tetsür noklang aikati yi bendena ayudak aser ayokba tesemtem raksatsü.
Maneni, Jorhat aser Titabar sub-division nung telok aikati sorkari ozüng alema yi yangluba mazüoketba atema lungkak ait.
Borholla College kaketshirtemi Titabar nung sentong ka agi aser Jorhat nung Assam Tea Tribes Students Association, Mahila Congress aser Madh Mukto Samiti teloktemi ‘lali gur’ noktangtsü aser tasür kibong shia nem sen lakh 2 masü saka lakh 5 agüjang ta takhangba agüja lungkak ait.