Jorhat nung nashishi atema tetsür ka amokmerener

Jorhat/Guwahati, April 11 (Agencies): Bajrang Dal züngsemtem aser Hindutva ajungketer nisung kari lai nashishi achiba indang tebilemba lemsatepba atema amokmerener ta Assam nung jhuman rights activist Bondita Acharya-i ashi.
Iba atema lai CID aser Jorhat Police tsüngdang ken o tem benokogo, ta Acharya-isa shisem.
Acharya ya Jorhat district nung alir aser lai ashiba agi, Bajrang Dal-i la dang Hindu nunger temulung yirutsüba atema yimjak nung tatok meshitsü takhangba agütsür.
“Jorhat nung nisung asem nashishi bena alia apuba sülen ni nübo agi tangar memenepba nisung kar den tebilemba lemsatep. Onok aika nashishi atema tebilemba kasa dang liasü aser iba jagi ni kü tebilemba metetdaktsü” ta Acharya-i osangbener dang ashi.
“Iba inyakyim ya Muslim nunger dak tenük yoka inyakba ka dang liasü aser iba jagi ni, nia Jorhat nung alir aser nashishi achir. Anungji, onok ajak tepuokdak ayutsüla ta ashi” ta laisa shisem.
Bondita Acharya ya Human Rights Defenders Alert (HRDA) nung northeast coordinator lir aser la Women in Governance (WinG)-India nunga züngsema lir.
WinG-India-i sangdong ka nung, “la ozüng alema tenüng menüktsür aser la tepsettsü, tashiyim agi raksatsütsü, teloki raksatsütsü aser acid shiloktsütsü ta amokmeren” ta metetdaktsüogo.
Ajisüaka, Bajrang Dal-i la amokmeren masü ta ashir, saka parnoki Acharya-i nashishi atema jembiba aitsü ta metetdaktsüogo.
“Hindu nungeri nashiji ‘gau mata’ ama külemer. Onoki la amokmeren masü. Loktiliba nung telemsa adokdaktsütsü aser Hindu nunger crore 130 temulung yirudaktsütsü atema lai o jembi. Hindu nunger temulung yirutsüsa o jembibatem anema onoki nokdaktsü” ta Assam Bajrang Dal assistant convener Dhrubajyoti Kalita-ia osangbener dang ashi.
“Acharje-i onok dang shidi ka ajanga la social media nung amokmerenba osang metetdaktsüogo. Nashishi atema lai tebilemba lemsatepba aser Jorhat nung nashishi bena alir nisung asem apuba anema lai o jembiba atema la amokmerener ta onok dang shiogo. Iba atema onoki bushisüngdang südar” ta SP (Jorhat) Prasanta Bhuyan-ia osangbener dang ashi.