Jorhat nung osangbener anema züluba atema nisung ka apu

Jorhat, Luroi (August) 17 (Agencies): Luroi (August) 10 nü Facebook nung lanur kati electronic media anema osang tamajung kar belenshiba atema tai tonglokja police-i apu.
Lanurji Bidyut Phukan ta jangjaogo aser pa ya Bohotia Gaon nung alir. Taoba hopta local journalist temi pa anema FIR ka benokba nung ajemdaker pa apu.
Jorhat nung aliba Hotel Manor nung osangbener senden ka amenba sülen Phukan-i parnok anema osang zülu.
Phukan-i parnok anema züluba aitsüba den pa dak ozüng tapet agi merenshiang ta Jorhat Press Club tir Niranjan Mahanta aser tongti tezülur Ananta Narayan Borthakur nati sangdong ka agütsü.
Tawa India nung media anema mapa inyakba, tashiyim agi media azüoktsü merangba kanga bulua inyaker, ta Jorhat Press Club-i ashi.
Phukan-i Facebook nung post asübaji nisung kari electronic media raksatsütsü atema inyakba alitsü akok, ta Press Club-isa shisem.
Phukan-i züluba post nung ‘osangbenertemi parnok mapa shitak meinyaker aser parnok kimai aludang züka merenshitsü’ ta zülua liasü.
Pragati Manor ta ser restaurant tajung ka nung taoba Amungnü (Deobar) dance bar (discotheque) ka lapok.
Ajisüaka, AJYCP-i iba dance bar lapokba yagi Jorhat nung lanurtem dak kongshitsü aser Assam sobaliba nung iba inyakyim densema mali ta Pragati Manor anema sangdong ka agütsü.
Iba sülen Pragati Manor-i dance bar lapokba jangjashitsütsü atema Media nisung kar jaoka osangbener senden ka amen.