Mokokchung, July 14 (TYO): Jorhat district, Assam tzümetsüng agi timtema alirtem nem teyari agütsütsü nüngtem nung ayongba angadi kenten sentong asangsang nung akatsü renemogo, ta ILM Group nung Seasonal Spokesperson, Longrangty Longchar aser ILM Group nung Seasonal Secretary, Imliyanger Aier nati sangdong ka ajanga metetdaktsü.
MMC Shopping Complex nung iba kenten sentong akatsü lemteter anogo ananü tsüngda nung I Love Mokokchung (ILM) facebook group ajanga lokti balala nungi iba sentong nungitsüpur jenti anidenogo.
Mokokchung nung aliba nüngtugu kentener aser entertainer tem aikati iba sentong nung taa magii shilem agitsü mulungogo. Mokokchung nung kentener aika dang lir aser sentong ayongertemi parnok den tongtepratepba mapang parnoki nungnanga melii shilem agitsü nangzüka liasü. Iba angadi kenten sentong nung shilem agitsü atema kentener kija aser telok 20 shi-i nangzükogo, ta kasa sangdong ajanga ashi.
“Kentener aser shilem babala agitsüpurtem nungi telangzüba tajung anguba atema ni kanga pela bilemer,” ta iba angadi kenten sentong nung Director, Adang Jamir-i ashi.
Kentenertemi rock, hip-hop, pop aser gospel kentem den ano ken tapu balala aika atentsü.
Iba sentong akatsü atema ILM nung metetdaktsüba sülen nungi nüburtemi tejangraba tulu sayuba ajanga iba setong ya tang tensa Mokokchung jila nung kenten sentong tulutiba ka asütsü imlar, ta sangdong ajangasa ashi.
Iba sentong nung shilem agitsüpur tenüngtemji: Tune Up Channel, Infuse, Scan Wheels, Funk Fuss, Sixer Six, Huntingboots Inc., School of Music, Mokokchung , Acappela Group Tongdentsuyong Ward, Lijem, Menty P, Madang, Renthungo Odyuo, Taliakum Pongen, Atoba Longkumer , Senti Longkumer(Tube Screamer), Ayusangla, Tiayanger, Limayanger , Imtichuba, Chubanungla, Tiasola Ozukum , Jentiyanger, aser Imchachet N Jamir nungertem lir.
Tanü asüng tsüngsangertemi ‘Pop Corn, Ice Crew, aser Stereo Freaks’ tsüngsangtem aitsü. Kenten sentong reprangi arurtem atema entry fee malitsü, ajisüaka tarurtemi pei mulungba tenla agütsütsü akok.
Sentong ayongertemi asenok teti shishilembadak tesem asen, kidanger Jorhat nunger timtemba shishia bilemja parnok den yariteptsü atema Mokokchung nüburtem ayokzük.
Meimchir dang taochi sayutsü atema arrtsü ajak alema otettsü aser ken ajanga nisung mulungjang ajak nung kongshir ta iba kenten sentong ajanga sayutettsü aser iba temeim mapa tila ka ya ajanga tesüiba mapang nungi tesentaktep tajung aliba ano tali tashi itshitsü onoki imlar, ta sentong ayongertemi ashi.
“Touch Jorhat’ ta ser ‘Know thy neighbor’ omen nung ajemdaker Jorhat tzü metsüng agi kongshir alirtem asoshi ayongba sentong ya parnok asoshi teyari tzüjang ka amai dang asütsü, ajisüaka iba tzüjang tsükdang tzüyim ji terabo arakzütsü onok teimla lir, ta parnokisa ashi.
Iba sentong nung nübur ajak arua dena ken aser tsüngsang tapu balala ajanga temoatsü angütsü aser ibaji ajanga kidanger timtemer mulungjang nung temeim tali jangjadaktsüdi. Tsüngremi nenok ajak moajang, ta sangdong ajangasa metetdaktsü.

You must be logged in to post a comment Login