Jose Mourinho Chelsea manager menden nungi anentsür

London, December 17 (Agencies): Portugal nunger Jose Mourinho Britain nung tentetba Chelsea Football Club manager menden nungi tanü Brehostibar nü anentsüogo.
“Chelsea telok den tangatettep nung Mourinho-i manager menden toktsüogo,” ta Chelsea teloki par Twitter account ajanga metetdaktsü.
Tang tasayadak English Premier League (IPL) football asayamong nung par Chelsea telok jenjang kangasa mejungi akümba yong Mourinho-i manager mendenji toktsütsü lemtet ta par teloki ashi.
Arishi küm 52 tain Mourinho-i 2013 küm nungi tenzüka Chelsea telok manager tanabenren abenba sülen pa lenisüba kübok par Chelsea teloki 2014-15 EPL asayamong takok marok agizüka liasü.
Ajisüaka, Chelsea teloki goal 1-2 agi tan Hombar nü tamakok anguba densema, tan 2015-16 EPL asayamong asaya 16 nung 9 ben tashi tamakok ajurua lir.
Tan asayamong tenzüker tanü tashi nung Chelsea teloki ajak agi points 15 dang ngua lir.