Joshna Qatar Classic quarterfinal-i iogo

Doha, November 02 (Agencies): India’er tetsür squash asayar, Joshna Chinappa-i takok ngua tang tasayadak Qatar Classic squash asayamong tetsür singles quarterfinal nung shilem agitsü jenjang tanü Hombar nü ajangzükogo.
Joshna-i tanü minute 37 nung points 16-14, 11-8, 11-8 ngua Egypt tsür Yathreb Adel tsükdaktsüba sülen quarterfinal asayatsü jenjangji angu.
Joshna-i tetenzükba asaya nunga World No. 1 Egypt tsürsa Raneem El Welily madak takok ngua liasü.
Lai England tsür Sarah-Jane Perry mesüra Egypt tsür Omneya Abdel Kawy na rong nung ka den quarterfinal asüng, Mongolbar nü asayatsü.
Ajisüaka, India nunger Saurav Ghosal-i points 7-1, 8-11, 3-11 ngua mezüngbuba round asaya nung Egypt nunger Fares Dessouki madak takok monguteti joko asayamong nung shilem magitettsüsa tanü jenjang tamajung nguogo.
Ano külen, tanü adoktsüba tesüsaba Professional Squash Association (PSA) asayar tarensen nung Dipika Pallikal-i temaleni jenjang 5 tashi atusü maongka ngua tang World No. 14 nung aliba osang jangjaogo.
Joshna-a temaleni jenjang 3 tashi tua tang World No. 17 jenjang abener asayar kümogo.