Journalist masü saka Aadhar ketdangser aputsüla: Snowden

New Delhi, Aenjeti (January) 09 (Agencies): America nunger whistleblower, Edward Snowden-i, India sorkari linük sensotem indang nija osangtem raksatsür, ta shia Aadhaar data anema inyakba osang jungkai adoktsüsang journalist pusema jembiogo.
Iba onük nung sorkari journalist aija jembiba dak sendakba nung Snowden-i, journalist anema inyaktsü melenbo, Aadhaar osang leak asüba atema Unique Identification Authority of India (UIDAI) nem ang temerenshi agütsütsüla, ta ashi.
Twitter ajanga Snowden-i, “Aadhaar osang leak asüba jungkai adoktsüba atema journalist sang anema bushisüngdang masütsüla; pa nem award agütsütsü temsüa lir. Tim obendang agütsütsü atema bilema lira sorkari India nunger billion aika indang nija osangtsüsang jenjang raksatsüba inyakyimji melenshitsüla. Iba onük nung aibelenertem pua aruner asü? Parnokiji UIDAI lir,” ta ashi.
The Tribune osang ajanga, Whatsapp nung “agent” ka nem sen 500 agütsüra pai Aadhaar number mashie ka indang osang agütsütettsü, ta sangdongba sülen alima nung biometric identity card scheme tulutiba (Aadhaar) ketdangsüba tentet, UIDAI mepelai liasü.
Iba dak sendakba nung UIDAI-i The Tribune report osangkaket aser osangbener anema FIR ka benoka liasü.
Iba telemtetba anema opposition party temi, UIDAI-i melung masüba nüburtem tebang nembangtsür ta aitsü, aser journalist tentettemia FIR ji agientsü takhangba agütsü.
Iba dak sendakba nung Hombarnü IT minister, Ravi Shankar Prasad-i, “Osangbeneretm sadoka inykatsü atema sorkari inyaktsü, iba den külemi India renloktsü atema Aadhaar security atema inyaktsü. Ni UIDAI dang police-i aibelenertem bushisngdangba nung Tribune aser parnok osangbenertem dang amalitepa inyaktsü atema mepishitsü tuyuogo,” ta metetdaktsü.
Tamalena Snowden-i twitter ajanga, India sorkari benokba Aadhaar osangtemji tim masüba nung amshitsüa akok, ta jembia liasü.