Joy Makhal-i Youth Parliament tetoktepba kokogo

Dimapur, Mongputeni/October 18 (TYO): State Level Parliamentary Quiz & Youth Parliament Debate Competition 2019, ATI Imagine Hall, Kohima nung October 18 nü kaogo. Iba sentong ya ‘Be the Voice’ omen nung ajemdaker Department of Parliamentary Affairs-i ayongzüka agi.
Minister for Planning & Coordination, Land Revenue & Parliamentary Affairs, Neiba Kronu-i sentong nung o jembidang youth parliament competition ya linük ajunga nung agiyonga odar aser iba ajanga asen state aser linük nung lanurtem mulungsentsü arangtetshitsür, ta ashi. Paisa, kaketshir ka asüba mapang ya angazüktsü asoshi mapang tajungtiba lir aser iba amala tetoktepba ajanga parnok dak tokteptsü tanüla poktetdaktsütsü renemshitsütsü, ta ashi.
Kronu-isa, taoba putu ama masü tanü putu nung ainertem kanga tia taka lir, kechiyong parnoki osang aser shisatsü balala media aser kaket ajanga agiteter, ta ashi. Paisa, kaketshirtem dang temaba jenjang tongtettsü asoshi meranga inyaktsü ajungshiba den alima den tokteptsü atema latest technology aser media balala amshitsü ajungshi. Maneni pai ashiba agi, kaketshirtem atema maongka mezüngdangtet lir saka parnoki meranga minyakra parnok tangar den metokteptettsü.
Commissioner & Secretary, Department of Parliamentary Affairs, Motsuthung Lotha-ia ojembiba mapang ashiba agi, youth parliament ajanga democracy tali akangshiba nung teyari agütsür aser lanurtem legislature inyakyim nung shilem agidaktsütsü asoshi hadir tajungka lir.
Dimapur district nungi Joy Makhal-i taküm Youth Parliament tetoktepba kokogo aser Thungchobeni T Ezung o Kevedülü Nakro nati tanabuba aser tasembuba jenjang ngutetogo. Parliamentary Quiz Competition, Wokha-i akok aser Longleng o Peren na tanabuba aser tasembuba jenjang nung liasü.
‘Lack of governance is responsible for slow growth and development in Nagaland’ and RIIN- advantages and disadvantages onük nung quiz aser debate tetoktepba agiogo.
Coordinator, State Level Youth Parliament, Evothung Ezung tetoktepba tetendanger liasü aser Asst. Professor, Kohima College Kohima Z Solo aser Asst. Professor, Kohima College Kohima, Dr. Eunice Alinger na quiz master liasü. Tetoktepba nung Phek, Wokha, Mokokchung, Kohima, Peren, Kiphire, Dimapur, Longleng, Mon aser Zunheboto nungi government aser private school temi shilem agiogo, ta ketdangser sangdong ajanga metetdaktsü.