JSA: CTR 2023 dak sendakba nung senden amen

Dimapur, Rongchii/April 13 (TYO): Chief Secretary Nagaland, J Alam IAS-i ayongzüka Jal Shakti Abhiyan: Catch the Rain 2023 dak sendakba nung lepa reprangshiba senden ka April 13 nü Chief Secretary indang Conference Hall, Kohima nung menogo. Iba senden nung JSA: CTR 2023 kübok department temi shilem agia liasü.

JSA: CTR-2023 ya 2023 küm March 4 nü linük kübok yimdak yimtsü aser jila/yimti ajak ayimjema district ajak nung “Source Sustainability for Drinking Water” from 04.03.2023 to 30.11.2023″ omen nung ajemdaker amenokogo.

Nüburtem nem tajemtsü tzü tajung agütsütsü asoshi tang aliba water source tem terenlok kanga nüngdaka aliba mapang taküm JSA ya water sources tem tajungba küma yanglushitsü asoshi rangloker inyakdar.

Senden nung JSA kübok department balala nungi ketdangsürtem den sensaksemba mapang Chief Secretary-i, Nagaland nung tzü agi anungba district pongu lir aser itemji Longleng, Kohima, Tuensang, Zunheboto, aser Kiphire lir ta ashi. Paisa, state nung tzü agi anüngba ya tebilemtsü tulu ka küma odar anungji state nung alirtem ajak atema sustainable water sources aser tzü rizünga ayutsü kanga tongtibang kümogo, ta ashi.

Paisa, teka amoka inyakba department tem dang masü saka sorkar aser nüburtemi iba inyakyim nung shilem tajung agitsü kanga tongtibang lir ta ashi.