Jubilee mapang loktiliba yanglushitsü atema ajungmesotsüla : T.R Zeliang

Dimapur, December 17 (TYO) : Dimapur nung yimtsüng tejentibatem rongnung taoba mapang Nagarjan ta ajaba Kuda village dena lir aser tanü parnok küm 75 ajungba jubilee mung nung yimkümertem bilemteta tetushi agütsüogo.
Kuda Village Baptist Church ground nung ayongzüka agiba benjung nung tongti tesemdangerji Nagaland Chief Minister, T.R Zeliang liasü aser tetushi süa jaokerji Dimapur Deputy Commissioner, Kesonyu Yhome (IAS) liasü.
Kuda yimtsüng tenteter mapang talangka aruogo aser platinum jubilee mapang ya asenoki inyaktetbatem reprangshiba mapang la lir. Iba mapang asenoki loktiliba yanglushitsü aser nübortem longjemtsü atema ajungmesotsüla ta T.R Zeliang-i tongti tesemdanger o jembidang ashi.
Kuda yimtsüng nungi takotet nisung aika adokogo aser maneni iba yimtsüng nung alirtemi Nagaland asoshi tajangzük agütsürtem adokdaktsütsü merangangma, ta paisa ashi.
Yimtsüng shiaji sobaliba aser yimyatsüya angadakba reju ka ama asütsüla. Tanü-asüng lanurtemi sobaliba aser ozüngtem junga memetet lir aser iba asoshi taintemi asen Naga nunger sobaliba sayutsüla, ta paisa shisem.
Jubilee mapang tesentaktep raksa alibatem yanglushir aser taitoktepba aser putepshiba tangatetba nung ajemdaker tesentaktep tasentem yanglur. Iba jubileemung tetezü keta amungtsü atema Kuda yimtsüng nung alirtemi iba kasa tangatetba sülen anidaktsüla, ta Nagaland Chief Minister-isa ayongzük.
Tanü T.R Zeliang-isa jubilee nüngo aser nüngshilung sayatsü aser Kuda Village Council multi purpose building lapokja liasü.
Tetushi süa jaoker Deputy Commissioner, Kesonyu Yhome-i o jembidang, tesüiba bilemtettsü aser ano kanga kar melenshia putu den liromedema aintsü atema ayongzük.
“Kanga dang kara ainba putu ka nung asenoki tesüiba mamadoktsüla aser ano tarutsü atema bilema inyaktsüla. Tang mapang ya asenoki sobaliba reju shia arudaktsütsü mapang ka lir” ta paisa shisem.
Sentong nung Social Welfare & Parliamentary Affairs minister, Kiyaneilie Peseyie, Angami Public Organisation president, Dr. Vilhousa Seleyi aser Chakro Public Organisation President, Vichutuolie Mere nungeria o jembi.
Jubilee mung nung Kuda Village Council Chairman, Achubu Meruno-i tesentepertem pela agizük, Souvenir Committee, Savi Leigise-i küm 75 indang otsü lemsatep aser Kuda Village Baptist Church Pastor, Rev. Miaielie Sakhrie-i temoatsü meshia sarasadem.