Jubilee Memorial College asütsü atema kimong meshitet

Longkhum, Oct. 10 (TYO): Jubilee Memorial College aser campus yanglutsü atema kimong meshitetba sentong ka Mongolbarnü Kohima-i aoba lenmang anasa Longkhum lushi nung agiogo. JMC asütsü aliba kimung ya Mokokchung town nungi kilometer 20 shi pilar lir.
Jubilee Memorial College ya 2015 küm tenzük aser iba college ya 2012 küm Mokokchung Town Baptist Arogo küm neter pungu ajungba Platinum Jubilee nüngtem nung inyaktsü renemba bangzüng ka lir.
2016 küm November 10 nü Longkhum den iba college asütsü atema MoU (memorandum of understanding) ka signed sütep aser Longkhum nungeri iba kimong ya telatetba kecha meyui angati MTBA nem tenla agütsü, ta osang ajanga angazüker.
Jubilee Memorial college ya tarutsü nung residential college ka ama tenzüka aotsü nükla lir, ta tanü MTBA Pastor Rev. Ponen Longchar-i osangbener den jembidang lemsatep.
JMC asütsü atema agütsüba kimongji tasazük nung acres noklang ana dak tali asütsü aser taküm nungi joko iba maparen tenzüktsü, ta paisa ashi. Iba college yangi amenokba ajanga Mokokchung district dang masü saka kidanger district-tem dena tajangzük angutsü imlar, ta paisa shisem.
JMC nung ya N.U syllabus dak alaka ano enrichment course ta sür talila ka densema agütsür. Tatishitsü agi; vocational course ama, counseling service ama aser tensa den apet shisatokden sentong balala ayongzüka akar. Item jagi tarutsü nung kaketshir ka degree anguba den külemi ano parnok taküm aser mapa balala nung teyari angutsü imlar, JMC Board of Governors mendenbuba Dr. Imtiwati Jamiri ashi.
Tang JMC nung ya Arts Stream dang lapoka lir saka tesülen campus tasenbaji renemerbo tanga stream balala lapokyonga aotsü nükjidong lir, ta osang ajanga angazüker.