Jubilee ya tatok agütsüba aser yimsoshiba mapang: Mar Atsongchanger

Dec. 19, 2015 nikongdang Mokokchung district kübok Mongsenyimti nung Mongsenyimti Baptist Arogo küm noklang jongmong mezüng sentep sentong nung Mongsenyimti Union Dimapur nungi nisung noklang kati Centenary Jemji, ‘Bam Hum’ apuba noksa nung angur. Nisung noklang kati külemi Jemji/Bam Hum apuba ya Ao lima nungbo tan mezüng asütsü.

Mongsenyimti, December 19 (TYO): Honibar aonung Mongsenyimti yimtak Mongsenyimti Baptist Arogo (MBA) küm noklang jongmong mezüng sentep sentong nung ABAM Executive Secretary, Rev. Dr. Mar Atsongchanger-i ‘Atangji Ibai Tsüngremer Sentong Liasü’ onük nung ajemdaker Tsüngrem O jembiba ajanga Centenary amunger kanga temoatsü nguogo.
Pai, “Asenok küm noklang ka jungogo, ta sangdongtsü atema sentepba masü, saka Khrista-i asenok den küm noklang ka jajaogo ta Tsüngrem Tenüngsangtsü atema sentepba lir,” ta ashi.
ABAM Executive Secretary-isa Laishiba nung ajemdaker Israel nungeri küm 50 shia Jubilee monga yimsoshiba indang teratet tejangja lemsatep.
Mar Atsongchanger-isa ashiba agi, Jubilee mapang ya tangar nem tatok agütsütsü aser Tsüngrem den tesentaktep yanglutsü mapang ka lir.
“Tsüngremer tesüngmangtsü sentong nung shilem aginüra, (asenoki) Laishiba dangi meyiptsüla. Asenoki tang dang nungi tali Tsüngrem bushira Laishiba nung aliba temoatsü ajakji asenok nem meküploktsütsü,” ta paisa ayongzük.
Taonung Mongsenyimti Senso Fellowship, Mokokchung-i Centenary sentong lapok aser Mongsenyimti Senso Union Dimapur-i Centenary jemji ‘Bam Hum’ apua liasü.
Sentong nungsa MBA Sannüker, O. Sashi Ozükum leniba nung asürtem bilemteta akhüm agütsü, Centenary Choir-i omen ken densema ken ana aten, MBA Deacon, L Ali-i tarurtem pelaa agizük aser Senso missionary Rev.Dr T Lima-i Centenary Otsü kaket sayatsü.