Judi Dench-i 8 buba Olivier Award agizüka otsü yanglur

London, April 05 (Agencies): Nüngtugu itangiter, James Bond film nung M ama tongti shilem agila, Britain actress Judi Dench-i 8 buba Olivier Awards agizüka Britain nung agütsüba tematiba theatre sempet otsü tasen yangluogo.
Nüngtugu sangro mejemer, saya zülur aser actor, William Shakespeare-i tesüiba mapang züluba ‘The Winter’s Tale’ saya nung Leontes ama shilem agir, Ireland nunger Kenneth Branagh den aroki Paulina ama shilem agiba nüngtem nung Dench-i Olivier sempetji agizüka liasü.
“Ni Olivier sempet agizüktsü maongka joko mangutsü ta ozü semchir dang ashiba sülen ni tan Olivier sempet agizüktsü maongka angur aser iba yongji ni nema medangtetsüsa tia ka ajurur lir,” ta 1997 küm mezüngbuba Olivier sempet agizükla, arishi küm 81 tain Dench-i London kübok Royal Opera House nung sempet agizükdang sentepa alirtem den lemsatep.
‘The Winter’s Tale’ sayaji London kübok West End nung taküm January ita ia sayua liasü.
Ano külen, ‘The Father’ nung shilem agisang, Kenneth Cranham-i Benedict Cumberbatch aser Mark Rylance na den temaba jenjang ngua Best Actor sempet agizükba osang jangjaogo.
‘People, Places & Things’ nung shilem agila, Denis Gough-ia ‘Photograh 51’ nung shilem agir, Nicole Kidman den temaba jenjang ngua Best Actress sempet agizüka liasü.
Martin McDonagh-i 1960s mapang Britain nung aibelener nem tasüba temerenshi agütsübaren agienba nung ajemdaker yangluba saya, ‘Hangmen’-i Best New Play sempet agizük aser ‘Three Days In The Country’ nung shilem agiba nüngtem nung Mark Gatiss nem Best Actor in Supporting Role sempet agütsüba osanga jangjaogo.