Judi Dench-i Queen Victoria ama shilem agitsü

Mumbai, June 21 (Agencies) : Oscar takok angur Judi Dench-i taruba film nung Queen Victoria ama shilem agitsü. Iba film ya ‘Victoria and Abdul: The True Story of the Queen’s Closest Confidante’ ta ser kaket nungi agizüka yanglutsü.
Iba kaket ya London nungi Indian journalist & author, Shrabani Basu-i züluba lir aser film ji Stephen Frears-i direct asütsü.
Iba kaket ajanga taoba mapang Empress of India, Queen Victoria aser arishi küm 24 tain India nunger Abdul Karim na tesentaktep indang otsü ashir.
Abdul ji London nung oa Queen Victoria golden jubilee benjungmung mapang waiter ama inyaktsü yokba liasü.
Queen Victoria atema taoba Scottish attendant John Brown asüba agi la temulung raksar aliba mapang lai asoajen aser tobur tajung Abdul dak tesünep angu.
Queen Victoria aser Abdul na tesentaktep kanga tashi itta aküm aser lai Abdul ji la indang ‘munshi’ (tesayur) ta tenüng jaloktsü.
Iba mapang Abdul-i Chubatsür dang Urdu oshi sayu aser laia pa dang English oshi sayu. Tena mapang talanglang külemi kazüba aser tena kanga aroka tesentaktep ayubaji Chubar kibongi magizük.
Iba film yanglutsü osang angashia kanga pelar ta kaketzülur Shrabani Basu-i metetdaktsü.
Iba film nung Stephen Frears-i director, Lee Hall-i screenplay writer aser Judi Dench-i lead actor ta shilem agitsübaji “dream team” lir, ta laisa shisem.