Judicial Panel kati Rohith asüba ken o bushisüngdangtsü

New Delhi, January 22 (Agencies): Tawa Hyderabad Central University nung azünger Dalit nunger PhD shisashir Rohith Vemula soseta asüba sülen ochi bushiba committee ka University jagi yoka liasü, aser parnoki agütsüba osang nung ajemdaker maneni iba ken o bushisüngdangtsü.

Rohith Vemula asütsüsa akumba kulitem bushitsü atema Judicial Commision ka tentettsü asoshi Hokolbarnü HRD ministry-i telemtetba agiogo.

Judicial commission jagi ita asem tsüngda report agütsütsü, ta human resource development ministry sangdong ka ajanga ashi.

Ministry-isa, tarutsü nungbo item ama mataloktsü asoshi University nung Vice Chancellors ajak aser senior ketdangsertem ajak kaketshirtem den amaliteptsü atema tesayuba agütsütsü, iba den külemi University campus nung kinkidong lokti bendanga amshiba mapatem khenyongi magizüktettsü, ta ashi.

“Central University Hyderabad nung tia maka tatalokbatem indang kuli bushitsü atema HRD-i ochi bushiba committee ka tenteta liasü, aser iba committee jagi January 22, 2016 nü ministry nem report agütsüogo,” ta kasa sangdong nung shia lir.

“Item kuli bushiteta aliba nung ajemdaker maneni reprangshia bushisüngdangtsü asoshi ministry-i judicial commission ka tentetogo,” ta kasa sangdong ajanga ashi.

Taoba Deobarnü Rohith tasümangji University hostel takdang tsüngbang nung anguba sülen linük tesem ajaklen lungkak aitdar.

Rohith soseta asüba ken o nung ajemdaker yimteren party temi Union minister Bandaru Dattatreya aser HRD minister Smriti Irani na menden nungi anentsütsü akhanger.

Yaküm August ita nung BVP kaketshir Susheel Kumar-i, Ambedkar Students’ Association (ASA) züngsemtemi (Dalit) pa dak azük ta ken o agütsüba sülen Hyderabad University-i Rohith den Dalit kaketshir-Sontha Prasanth, Pepapudi Vijay Kumar, Sheshaiah Chemudugunta aser Velpula Sunkanna nunger hostel, library, mess aser kaketshirtem adenshitak tesemi aotsü memelai liasü.