Judiciary aser press-i BJP tsübur: Rahul

Raipur/New Delhi, Monupii/May 17 (Agencies): Tanü Karnataka nung single largest party- BJP nungi BS Yeddyurappa Chief Minister inyaktsü atema tenangzükba agiba anogo nung Congress Party Tir, Rahul Gandhi-i, linük judiciary aser osangbenertemi BJP tsübur, ta metetdaktsü.
“Tesüiba küm 70 tsüngda tang mezüng Supreme Court nungi judge pezüi nübur teyari aginüa osangbenertem dang parnok tashi sota ayuba, amokmerenba aser junga meinyakdaktsüba indang lemsatepogo. Shidakba agibo ochi temeden atema nüburtemi ang Court dang aoer, ajisüaka tang mezüng democratic linük India nung ya atalokogo. Pakistan aser Africa nung aliba linüktem nung atalokba ama nisung ka kijai tashi alia amshiba ataloktsüa akok, ajisüaka tang tashi nung yangibo yamaji matalok,” ta Rahul-i ashi.
Tanü Chhattisgarh yimtiba, Raipur nung aliba Balbir Juneja Indoor Stadium nung Jan Swarajya Sammelan anogomong sentong nung state trok nungi Panchayati Raj züngsemtem den jembidang Rahul Gandhi-i, “Tang mezüng nisung tepsetba ken o nung tai tonglokja alir kati (Amit Shah) Tir ama linük nung national party ka (BJP) anir. Ano külen judiciary-i tetsübu nung inyaker, osangbenertemi tetsübu nung inyaker, ibaji dang masü Parliament nung BJP züngsemtemia parnoki Ato kilonser (Modi) matsüngdang tetsübu agi kecha mejembiteter ta shiogo,” ta metetdaktsü.
BJP maneni aija Rahul Gandhi-i, sorkari aluyimertem atema meinyaker, ta ashi. “Aluyimertem crore aikati parnok dang sentsüh atoktsü atema akhanger, ajisüaka Union finance minister-i, ibaji sorkar mapatong nung dena mali, ta ashir, ajisüaka ano külenbo sorkari linük nung takar 15 dangbo sentsüh 2.5 lakh crore tokogo, süra ibajibo sorkar mapatong nung dena ali asü? Ajisüaka Arun Jaitley-i iba atemajibo kecha mejembir,” ta paisa ashi.
Karnataka elections dak sendakba nung Gandhi-i, “Linük temzüng amokmeren tia nung lir. JD(S) MLA tem külen aser Angh külen lir. JD(S)-i, (BJP)-i par MLA tem sen crore 100 agi mesüzüktsü meranger ta shiogo. Ochimashi iba jenjang nungji lir,” ta ashi.
Paisa, RSS aser BJP nati dalits, tetsürtem aser tribals atema mebilemtsür, ta ashi.