Judiciary independent ali tashi nüburtemi metsübutsüla: CJI

New Delhi, December 06 (Agencies): Linük nung akümtsübutep maliba onük nung o toktepba ya yimtenren onük ka lir ta shia Deobar nü Chief Justice of India (CJI), TS Thakur-i, judiciary independent ali tashi, aser ozüng benoktet tashi nungbo nüburtemi tsübutsü mesüra shisabulutsü nüngdak madoker, ta ashi.
New Delhi nung osangbenertem den jembidang tang CJI tasenba Thakur-i, “Iba ya yimtenren onük ka. Ozüng benoktsü temzüng lir. Anungji ibaji ali tashi, independent judiciary ali tashi aser court temi temetentem aser teinyaktsü inyak tashibo nisung shingaia kecha tsübutsü madoker ama ni bilemer,” ta ashi.
“Temzüng benokba reju (Supreme Court) ka nung ni tekolak aser senso ajak temeten kümzüka ayutsü. Lokti telemsa ajak nungi nüburtem temeten kümzüka onoki yutettsü ama ni bilemer. Sensotem temeten kümzüka yutettsüsa ozü reju dak tashi lir. Temeten kar sensotem atema aser senso masürtem atema-a temeten kar lir aser onoki item temetentem kümzüka yutettsü,” ta Thakur-i ashi.
Paisa, “India ya linük tulu ka lir, aser nenoki kecha metsübutsüla. Item ya bilemlokbatem dang lir. Judiciary independent ali tashibo tsübutsü nüngdak madoker,” ta ashi.
Osangbenertemi asüngdangba ka langzüdang pai, “Ni iba nungjibo kecha melangzüner,” ta ashi.