Judiciary inyakyim nung melung malemer: NPCC

Dimapur, May 26 (TYO) : Nagaland Chief Minister, T. R Zeliang tazüngba degree onük nung Gauhati high court, Kohima bench-i Judicial Magistrate First Class, Peren nem nungloktsüba sülen paji Peren nungi tangleni yokba dak sentakba nung Nagaland Pradesh Congress Committee (NPCC)-i, ajungbena Judicial Magistrate First Class Peren aser Phek na tesem melenteptsüba ajanga judiciary inyakyim nung temulung malemtsüsa akumer, ta NPCC Working President, P. Ayang Aonok-i sangdong ka ajanga ashi.

“Judicial Magistrates transfer aser posting atema state sorkari masü saka High court-i tetuyuba agüja inyaker. Iba telatetba nung ajemdaker, department mesüra tim ketdangseri lateta aliba kübok inyakogo ta jangjar,” ta NPF-i metetdakja liasü.

NPF sangdong ajangasa ashiba agi, “Gauhati High Court Chief Justice-i Kohima nung March 22, 2016 nü Nagaland Chief Minister T. R. Zeliang ajurua state nung judiciary dak sentakba tongtibang onük aika nung o lemtep aka. O lemtepdang Zeliang-i state nung judiciary inyakyim indang metetdaktsü. State nüburtem nem ochi obendang agütsüba atema pai GHC nema tenüngsang agütsü. Iba sülen Zeliang-i chiyung ayong.”

Judicial Magistrate First Class Peren aser Phek cross transfer atema NPCC-i tim ketdangser den jembidang NPF-i iba onük nung High Court tetshia, “Judicial Magistrates transfer aser posting ji state sorkari masü saka High Court-i inyaker mesüra tetuyuba agütsür,” ta jembibaji kanga tesasatsüka lir, ta NPCC sangdong nungsa shia lir.