Judoka Avtar Singh-i Rio Olympics nung shilem agitsü

June 04 (Agencies): Brazil kübok Rio de Janeiro nung taküm August ita 5 nü nungi tenzüka asayatsü ayongba 2016 Rio Olympics asayamong kübok Judo tetoktepba nung shilem agitsü jenjang tajung India nunger Avtar Singh-i tanü, Honibar nü ajangzükogo.
“India nunger Judoka, Avtar-i continental quota nungi Rio Olympics nung shilem agitsü jenjang anguba osang International Judo Federation (IJF)-i metetdaktsüogo,” ta Judo Federation of India (JFI) nung Tir, Mukesh Kumar-i osang jangjashitsü.
Temang touzük seret 90 taret shilem nung toktepsang, Avtar ya Punjab kübok Gurdaspur nunger lir aser pa Punjab Armed Police nung züngsem aliba osang jangjaogo.
2011 küm ayongba Asian Junior Judo Championships nung bronze medal agizüker, Avtar-i taküm 2016 küm February ita Meghalaya kübok Shillong nung ayongba South Asian Games nunga gold medal agizüka liasü.
Avtar-i taoba mapang, 2013-14 aser 2014-15 na nunga Senior National Judo Championships gold agizükba osang jangjaogo.
Uzbekistan nung taküm April ita agiba Asian Judo Championships nunga Avtar-i China aser Iran madak takok ngua 5 buba jenjang ajangzüka liasü.