Juhi Chawla-i plastic ajanga timtem agütsüba tuteta ashi

Mumbai, January 08, 2017 : Honibarnü actor, entrepreneur aser lokti atema inyaker Juhi Chawla-i plastic amshiba ajanga timtem balala agütsüba atema tesayuba agüja liasü.
“Plastic amshiba ajanga lokti tilaba nung dang masü saka alima rangben asoshi timtem balala agütsür. Supreme Court-i ashiba agi tang asenoki plastic amshiba menokdangra taruba putu nung atom bomb agi agütsüba lendong dang tesashiba agütsütsü. Plastic ya ali küma maor. Asenoki lenmang, tzüküm, ayong aser tesem ajaklen plastic angur. Plastic agi yangluba oset ajak küm meyirjang kabosa alir. Plastic agi yangluba oset ajak nung mim mesükba oset (toxin) keta lir,” ta Juhi Chawla-i Mumbai Rotary club nung ashi.
“Kü kinungbo tenoi ashiba agi tzüyimtem nung plastic ya asetkong mesüka aika lir. Pai item plastic nangdenbaji koba taka uluar itemji ashidangang ni kanga aoksa. North Pacific tzüyim nung plastic nangdenbaji Africa lima taka lir,” ta lai shisem.
“Asenoki lipoküm kanga mejungi raksar saka asenok aikati ibaji memeteter. Plastic agi tzü mejungi kümdaktsür. Chiyungtsü nung plastic aliba chisemba ajanga asenok sasa cancer tashidak bena arur. Asenoki iba tsütsü terenlok asoshi khen bilemdangtsüla. Asenok shishilembai aoba mapang sü mesüra jute juli bener aotsüla aser benjongbentsü nung plastic agi yangluba auso, marok mesüra pongdangtem mamshitsüla,” ta laisa ashi.