Juhi Chawla, Siddiqui-i Indira Gandhi Award 2015 agizüktsü

Mumbai, Nov. 18 (Agencies): Bollywood actor Juhi Chawla aser Nawazuddin Siddiqui na densema nisung teneti kanga akhümket award, Indira Gandhi Memorial Award 2015 angutsü, ta Bodhbar nü ketdangser kati ashi.

Tena dak alia tanüngba award angutsüpurtemji- International saisaponger, Kavita Raut, Marathi osangkaket Punyanagri nung mezüng tetsür yimobilem zülur, Rahi Bhide, kaketzülur,   Kavita Mahajan, shisashir Farida Lambay aser Industrialist Megha Phansalkar nunger lir.

Kanga nüngtugu actor Nawazuddin-i “Manjhi: The Mountain Man” nung tongti shilem agia liasü aser taküm küm atema iba award agizüker rongnung teburbo pa kija shimogo, ta Mumbai Congress Tir, Sanjay Nirupam-i ashi.

“Kanga tongtibang nisung ana – taoba mapang Lok Sabha Speaker Meira Kumar aser All India Congress Committee general secretary, Janardhan Dwivedi napronglai taoba mapang Ato kilonser asür, Indira Gandhi den mapang talangka inyaka aruogo, aser iba sentong nung tena tongti tesemdangsertem asütsü aser tenati award angurtem nem tetushi agütsütsü,” ta Nirupam-i osangbenertem dang ashi.

Iba award nung senpet mesüra tanga tajangzük mali, Indira Gandhi asoba anogomung nung maparen balala nung tongtibang nisungtem nem iba award agüja arur.

Iba sentong ya Brihostibar nü Mumbai, Y.B. Chavan Auditorium nung akatsü. Iba anogo ya Indira Gandhi asoba 98buba anogomung lir. Iba sentong nung Congress lenirtem, taoba union minister aser MLA tem aika adentsü.