Julen Lopetegui Real Madrid coach asütsü shimogo

Madrid, Aami (June) 12 (Agencies): Spain coach Julen Lopetegui World Cup tembangba sülen küm asem atema Real Madrid manager asütsü asoshi shimogo, ta Madrid puri Sangtennü metetdaktsü.
Küm asem atonga Champions League title akokba hopta ana tejakdang France nunger coach Zinedine Zidane-i Real coach menden toktsü.
Lopetegui shiba 2020 tashi Spain team coach asütsü asoshi tezüngzüktepba tasen ka yanglua liasü, pa Real nungi asayar ka ama küm asem asayaogo.
Arishi küm 51 tain Lopetegui ya Vicente Del Bosque mapa nungi anenba sülen 2016 küm Spain national team coach asütsü asoshi shimtet. Del Bosque-i 2010 World Cup aser 2012 European Championship takoki par linük aniogo.
Lopetegui lenisüba kübok Spain team asaya 20 tashi khen dang tamakok mongui asayaa arudar aser parnok Rogonü World Cup Group B nung Portugal den Sochi, Russia nung asayatsü aser iba sülen Iran aser Morocco den asayatsü.
Taoba mapang goalkeeper alisang Lopetegui Real’s B-team Castilla coach ama season ka (2008-09) inyaka liasü aser iba sülen 2010 küm Spain Under-19 team manager mapa agizüka inyak.
Pa Under-19 team manager inyakba mapang nung parnoki 2012 Under-19 European Championship akok aser ita 12 lir Under-21 coach ama pai aniba teloki European Championship akok.
Ajisüaka pa Club nung coach ama kanga takok ngua inyaka mali. Pa 2003 Spain indang second division club Rayo Vallecano puri mapa nungi anentsü aser iba sülen Portuguese club Porto nung 2014 nungi 16 tashi inyakba nung takok kecha mongutet.