Julie Andrews-i Sydney nung ‘My Fair Lady’ direct asütsü

Sydney, August 05 (Agencies): British actress, Julie Andrews-i Opera Australia telok tenüng nung tanaben yanglushitsü renemba ‘My Fair Lady’ musicial film direct asütsü renemba osang ka Sydney Morning Herald osang ajanga metetdaktsüogo.
Tasenba ‘My Fair Lady’ film ya Sydney Opera House nung taruba 2016 küm August ita sayatsü sentong lir.
“Tony Award agizükba choreographer Christopher Gattelli-ia ‘My Fair Lady’ film tasenba yanglutsü nung tongti shilem agitsü renema lir,” ta shia, Andrews-i iba film direct asütsü osangji Opera Australia nung artistic director, Lyndon Terracini-i sangoktsü.
Arishi küm 79 tain Andrews-i 1956 küm yangluba Broadway saya, Eliza Doolittle nung Doolittle ama mezüngsüa tongti shilem agia liasü.
Andrews-i lar tanabuba Broadway saya, Mary Poppins nung Poppins ama kangasa junga shilem agiba yong lai Academy Award agizükba den külemi, ‘The Sound of Music’ aser ‘Victor/Victoria’ na densema nüngtugu film balala nung tongti shilem agitsü maongka angu.
“Opera Australia-i produce asütsü renemba film direct asütsü asoshi kü nem maongka tulu agütsüba atema kanga pelar. Aji oda, ni taküm November ita Sydney yimti semdangtsü kanga dang yongyar,” ta Andrews-ia metetdaktsü.
Opera Australia tenteter küm 60 abensaba nüngtem nung 1964 küm mezüngsüa yangluba ‘My Fair Lady’ musical ya tanaben tasen küma yanglushir lir.