Julius Caesar taküm otsü film, ‘Emperor’ yanglu tenzüker

Los Angeles, August 28 (Agencies): ‘Twilight Saga’ aser ‘The Hunger Games’ film yangluba Summit Entertainment teloki White Horse Pictures den külemi lungjemer Rome nunger nüngtugu yimsüsür, Julius Caesar taküm otsü nung ajemdakba ‘Emperor’ film yanglu tenzükogo.

Nüngtugu kaketzülur, Conn Iggulden-i züluba mezüngbuba otsü kaket 2, ‘The Gates of Rome’ aser ‘The Field Of Swords’ otsü na nung ajemdaker Caesar aser par ketdangser, Marcus Brutus na indang otsü sayuba film ya film ishika tarensena yangluba film mezüngbuba asütsü akok ta Deadline-i metetdaktsü.

“Ceasar o Brutus na indang otsü densemba Emperor film nung tongti actor-temi shilem agitsü tenzükogo,” ta Lionsgate Motion Picture Group nung mendenpur, Rob Friedman aser Patrick Wachsberger nati metetdaktsü.

‘Emperor’ film ya alima ajunga nung nüburtemi kanga dang sapua reprangtsü tamang akaba olen ka tenatisa shisem.

‘Cast Away’ film indang otsüren zülur, Broyles, Stephen Harrigan aser Burr Steers nunger den külemi, ‘The Grey’ kaket zülur, Ian Mackenzie Jeffers-i ‘Emperor’ film nung amshitsü otsüren renemba osanga angazükogo.