July 1, 2017 nü nungi Aadhaar-PAN sendakteptsüla: Sorkar

New Delhi, June 28 (Agencies): GST dak sendakba nung tanü Centre sorkari, saru agütsütsüpurtemi July 1, 2017 nü nungibo tang aliba Aadhaar number ji PAN card den sendakteptsüla, ta metetdaktsü.
Income tax temzüngtem metetdakja sorkari, permanent account number (PAN) atema application agütsüdang züngdangba 12 aliba biometric Aadhaar mesüra enrolment ID agitsü, ta metetdaktsü.
Union Finance minister, Arun Jaitley-i 2017-18 küm atema Finance Bill benokdang income tax returns atema Aadhaar agitsü asoshi benoka liasü aser nisung kati PAN card aika amshia saru magütsüba anema PAN o Aadhaar na sendakteptsü atema benoka liasü.
Revenue department-i, “July 1, 2017 tashi nung PAN card alirtemi pa indang Aadhaar number ji Principal director general of income tax (systems) mesüra DGIT (systems) nem agütsütsüla,” ta metetdaktsü.
Item ozüng ya July 1, 2017 nungi tenzüka benoktsü, ta revenue department-i metetdaktsü.
IT Act kübok Rule 114 yanglushiogo (PAN application).
Tang tashi nung saru agütsür nisung crore 2.07-i parnok indang PAN den Aadhaar sendaktepogo. Linük nung PAN card alir nisung crore 25 dak tema lir aser Aadhaar card nisung crore 111 nem agütsüogo.
Tan ita tenzüklen Supreme Court-i I-T Act yanglushiba agizüka liasü.
Aadhaar card ya UIDAI-i agütsür aser PAN card ya I-T department-i agütsür.