July 18 nungi Parliament tenzüktsü, GST Bill agizüktsü imlar

New Delhi, June 29 (Agencies):  Tanü Centre sorkari, July 18 nungi tenzüka August 12 nü tashi Parliament senden alidang GST bill agizüktettsüsa teyari peria lir, ta metetdaktsü.
Union Home Minister, Rajnath Singh mendenbuba ser Cabinet Committee on Parliamentary Affairs senden amenba sülen osangbenertem den jembidang Parliamentary Affairs Minister, M Venkaiah Naidu-i, nüngdak apir iba senden ya anogo ana-asem atsülangtsü mesüra tajemba akumtsü akok, ta ashi.
Tang atemabo iba senden anogo 20 amentsü.
Linük atema GST bill ya tongtibang ta shia Naidu-i, “Onok pusemer taliba kümogo aser GST Bill atema züngsem peria lir,  saka iba bill agizükba nung party ajak dendaktsüner, kechiyong ibaji ajanga state tem kongshitsü,” ta ashi.
Iba bill ya ajaki pusema agizükner aser iba atemaji sorkari meranga inyaker, aji ta masüyonga iba senden nungsa agizüktsü, ta pai ashi.
Iba onük nung vote magiteptsü merangtsü, ajisüaka koda mesüra iba ya Constitutional Amendment Bill ka asünung vote agitsüa akok, ta pai ashi.
Iba nung ya Congress-a dendaktsütsü atema sorkari mera agia inyaktsü asü, ta asüngdangba langzüdang pai, Union Finance Minister, Arun Jaitley-i maneni Congress densema party ajak den o lemteptsü melunga lir, ta ashi.
Cabinet Committee on Parliamentary Affairs senden nung External Affairs Minister Sushma Swaraj-i Naidu dang, züngsemtemi melungra tawa Ato kilonseri bendang linüktem semdanga India NSG züngsem akümtsü atema jembiba dak sentakba nung o lemteptsü melunga lir, ta ashi.
Kasa senden nung Rajnath-i Lokpal & Lokayukta (Amendment)Bill tekeraba nung agizüktsü atema benok aser Environment Minister Prakash Javadekar-ia tekaraba nung Compensatory Afforestation Fund Bill agizüktsüla, ta ashi. Bill anaprong ya Parliament nung anendaka lir.
Osangbenertem dang Naidu-isa, GST bill dak alia sorkari medical aser dental college tem atema Combined Entrance Exam ordinance melena bill asem agizüktsü atema benoktsü  aser Enemy Property Act amendment atema bill ka benoktsü, ta metetdaktsü.
Naidu-i, bill 56 magizükteti anünga lir- Lok Sabha nung bill 11 aser Rajya Sabha nung bill 45 anünga lir, ta ashi. Iba den külemi pai ministry balala dang tajemba agi bill tasen 25 bosa benoktsüla ta metetdaktsüogo.
Naidu-i ashiba agi, kodang GST bill agizükdir India rongsenkettsüng taliba aintsü.
“Ibaji temelung nung yur ni yimtenren party ajak dang iba bill agizüktsü atema yaritsü mepishir. Onoki mapang aika laluogo. Onoki jungjunga shisadangogo. States nungi finance minister tem den o lemtep peria kaogo,” ta pai ashi.
Iba bill, atema sorkari tanen makai Congress Party densema party ajak den tongtepa jembir ta shia Parliamentary Affairs Minister-i, “Onoki maneni parnok den jembitsü aser senden junga katettsü atema jembitsü,” ta ashi. “Parliamentary Affairs Minister ka ama iba ya taruba Parliament nung agizüktettsü ni imlar,” ta pai ashi.
Mangatettep aliba Constitution (One Hundred and Twenty-second Amendment) Bill, 2014, koba dang GST Bill ajar, iba bill ya Lok Sabha nung agizükba sülen yaküm August ita nung Rajya Sabha nunga benok ajisüaka magizükteti arur.
Ano tanga tongtibang Bill kaji Whistle Blowers Protection (Amendment) Bill, 2015 lir. Iba bill ya yaküm December ita nung benok saka magizüktet.
Lok Sabha nung magizükteti aliba tongtibang bill tem rongnung Consumer Protection Bill 2015 aser Benami Transactions (Prohibition) Amendment Bill, 2015 lir.