July 23 nü Dhaka nung JBWG senden alitsü

Agartala, July 19 (Agencies) : India aser Bangladesh tsüngda Joint Boundary Working Group (JBWG) pur July 23 nü Dhaka nung senden ka alitsü.
Iba senden nung taoba Parliament session nung Land Boundary Agreement (LBA) agiba indang onük jembiteptsü.
LBA kübok linük ana tsüngda ali melenteptsü atema JBWG-i arr ladangtsü. Iba senden nung India, Bangladesh aser Myanmar nungi nübotem adentsü aser parnok den Bangladesh den arrtsüa aliba northeast state tem nungi secretary level officer tema adentsü.
Tripura tenüng nung state revenue secretary Punit Agarwal adentsü.
Tripura kübok ashishitep aketba yimtsüng Chandannagar India nunger lushi nung lokteptsü aser Muhuri Char yimtsüng Bangladesh den lokteptsü, ta Tripura Revenue Minister, Badal Choudhury-i osangbenertem dang ashi.
Chandannagar nung nütsüng yongsük nisung 300 shi lir. Iba ya India aser Bangladesh tsüngda ashishitep aketba enclave 162 nung dena lir. Item enclave ya India nung 111 aser Bangladesh nung 51 lir aser iba nung alirtem linük anaprong nung senso angutsü temeten mali liyonga arur.
Chandannagar yimtsüng atema ashishitepka, tesüiba küm 40 tema India sorkari iba yimtsüng nung welfare schemes ajak agüja arur.
Iba yimtsüng nung kibong 51 nungi nisung 300 shi lir aser 2002 küm arrtsü atsüdangba mapang kilen ana dak alaka tanüngba kibongtem ajak anameta aliba yim ka nung jenok.
Dhalai ayong anasa Chandannagar yimertem arrtsü anatsülen alu yimdaktsür saka mapang timbaka Bangladesh nungertemi parnoki tsünütetbatem bener aoer.
India prime minister Indira Gandhi aser Bangladesh prime minister Sheikh Mujibur Rahman na tsüngda tenangzükba agitepba sülen küm 41 lir külen taküm Parliament-i Bangladesh den LBA mapa küma inyaktsü atema telemtetba ka agi.
Iba tenangzüktep ajanga ali acre 17,160.63 shi nung aliba enclave 111 tashi Bangladesh keti aotsü aser ali acre 7,110.02 shi tasazük nung enclave 51 India keti arutsü.
Iba ya ajanga India kübok West Bengal, Assam, Tripura aser Meghalaya nung enclave 51 tashi benoktsü aser tanüngbatemji Bangladesh den zükloktsü.