July 30 nü Yakub Memon alenseta südaktsütsü

Nagpur, July 15 (Agencies): 1993 küm March 12 nü Mumbai nung bomb aika pokdakja amakba nung tongti aibelener rongnung ka, Yakub Memon July 30 nü alenseta südaktsütsü, ta Bodhbar nü sorkar ketdangser osang ka ajanga ashi.

Osang ajanga ashiba agi, pa dang puoka aliba jail, Nagpur Central Jail nung alenseta südaktsütsü. Pai taochi meshia züluba shidiji Tiri magizük, ta ketdangser kati ashi.

Arishi küm 53 Yakub-i Mumbai bomb lendong nung shilem agiba asoshi alenseta südaktsütsü, ta paisa ashi.

Ano tanga osang ka nung Nagpur Jail superintendent Yogesh Desai-i, “Yakub ji Nagpur jail mesüra Pune nung aliba Yerwada jail nung alenseta südaktsütsüa akok,” ta ashi.

Tasüba agi memerenshitsü asoshi Memon-i mepishibaji Supreme Court aser Tir napronglai magizük.

Osang ajanga angazükba agi, alenseta südaktsütsü asoshi anogo aser mapang lemtetbaji Maharashtra chief minister Devendra Fadnavis-i agizükogo. Par kibong züngsemtem nema iba osang metetdaktsüogo, kechiyong ibaji inyakyim nung lir, ta sorkar osang ajanga ashi.

Memon ya charted accountant ka lir aser bomb pokdaktsüba nung pa madenyonga iba sentong yangluba nung pa densema lir ta aitsür. Iba kasa ken o nungsa pa adianu aser tongti aibener Ibrahim Memon bo tanü tashi menguteter.

Memon-i taochi meshiba shidiji Tir Pranab Mukherjee-i magizük aser alenseta südaktsütsü anogo latettsü asoshi Maharashtra nem nunglokja liasü.