June 15 nungibo UP lenmangtem nung ongken malitsü: Yogi

New Delhi, April 30 (Agencies): June 15, 2017 nü tashi nungbo Uttar Pradesh nung aliba gari lenmangtem nung ongken kata malitsü, ta Deobarnü state Chief Minister, Yogi Adityanath-i metetdaktsü.
“Gari lenmang nung ongken aika aliba state ji UP liasü aser aonungbo lenmangtem khenyongi tammang liasü, ajisüaka June 15 tashi nungbo UP gari lenmangtem nung ongken malitsü aser tesangwa alitsü atema onoki inyaktsü lemtetogo,” ta pai ashi.
State nung electric light dak sendakba nung UP Chief Minister-i, “District headquarters ajak nung mapang ajak nung electric light alitsü, jila HQ shia nung anogoshia light ghonda 20 alitsü aser yimtsüng nung anogoshia ghonda 18 light alitsü atema onoki inyaktsü,” ta metetdaktsü.
Paisa, state sorkari ‘divyangs’ (Persons with Disability or differently-abled) atema pension sen 300 aliba nungi sen 500 kümtsütsü, ta metetdaktsü.
Ato kilonser, Narendra Modi-i matamabensartem taküm jenjang ajungkettsüner, ajioda sorkari nüburtem yaritsü atema scheme aika benoka inyaker, ta paisa ashi.
“UP assembly elections nung BJP-i majority agi takok anguba ya Ato kilonser, Narendra Modi indang welfare schemes ajanga lir. Modi-i Gorakhpur nem AIIMS agütsü aser küm 26 tashi shibanger aliba fertilizer plant asentenshia tanaben lapoktsü,” ta paisa shisem.