June 16 nungi anogoshia petrol/diesel jenjang balala asütsü

New Delhi, June 08 (Agencies): June 16, 2017 nü nungi tenzüka petrol pump nung petrol mesüra diesel alidang anogoshia jenjang balala agütsütsüsa akümtsü, kechiyong taruba hopta (June 16) nungi tenzüka linük tesem ajungalen totzü company temi anogoshia petrol aser diesel jenjang reprangshia yanglutsü.
May 1, 2017 nungi tenzüka totzü company temi yimti pongu nung iba maparen ya tama tenzüka liasü, aser maneni kasaji linük tesem ajunga nung inyaktsü.
Mezüngbubaren nung Udaipur, Jamshedpur, Puducherry, Chandigarh aser Vishakhapatnam yimtitem nung oil marketing company temi anogoshia petrol aser diesel totzü retail selling prices (RSP) yanglua liasü.
Indian Oil Corporation Limited (IOCL)-i sangdong ka ajanga, “Anogoshia petrol aser diesel jenjang reprangshia yangluba ajanga inyakyim teladak sayutsü. Iba ya ajanga refinery/depots nungi retail outlets-i methitemi totzü yoktsü. Terenlok aliba linüktem aikati anogoshia Petrol aser diesel totzü jenjang reprangshia yanglur,” ta metetdaktsü.
IOCL-isa, oil marketing company temi nüburtem dang, anogoshia totzü jenjang sangdongtsü atema mera agia inyaktsü, aser iba nungji osangkakettem nung sangdongba, petrol pump nung jenjang sayaba, totzü jenjang osang data/SMS ajanga yokba aser mobile apps ajanga metetdaktsüba densema lir, ta metetdaktsü.
Tan ita tetenzük tashi nung Indian Oil Corporation Limited (IOCL), Bharat Petroleum Corporation Limited (BPCL) aser Hindustan Petroleum Corporation Limited (HPCL) company temi alima nung totzü jenjang aser foreign exchange rate apir hopta ana shia petrol aser diesel jenjang yanglushia arua liasü.