June 17, 2016 nü Rattle & Hum Kohima nung ACAUT Nagaland indang theme song sayaba sentong nung agiba noksa ka angur.

Hyderabad, June 17 (Agencies): June 25 nü Pune nungi Ato kilonser, Narendra Modi-i Smart City projects mapa tenzüktsütsü, ta tanü Union Urban Development Minister, M Venkaiah Naidu-i metetdaktsü.
Kasa mapang linük nung yimti 20 nung Smart City project tenzüktsü, ta Naidu-isa shisem.
Yimti kar nung ‘smart cities’ terenlok mapa inyakba ajanga tanga yimtitema terenlok mapa  inyaktsü atema ajungmesotsü, ta paisa ashi.
“Iba ya tesangwa aliba ki ka mesük. Tesangwa aliba ki ka lira ajaki ibaji repangtsü. Smart yimti kar nung terenlok kara, tangartem rongnunga tetoktepba alitsü,” ta pai ashi.
Smart City mission ya NDA sorkar mapatong rongnung ka lir, aser sorkari iba ya June 25, 2015 nü sangdonga liasü.
Tanü Hyderabad nung Union Minister Naidu-i, Ato kilonser Modi-i junga shisadangtetba ajanga linük terenlok lenmang nung anidar, ta ashi.
Paisa ashiba agi, “Yanglushiba, inyakba aser melenshibaji NDA sorkar aser Modi omen lir. Narendra Modi ya linük yanglushir, inyaker aser melenshitsür ka lir ta onoki nümadanga ashir.”
Taoba mapang nung Naidu-i Modi ji “Tsüngremi India nem agütsüba sempet ka” aser “sensakertem atema tekümzüker ka lir” ta tenüngsanga liasü.
Rajasthan nungi Naidu Rajya Sabha züngsem shimba sülen pai Telangana BJP headquarters semdangba mapang pai, “Onok züngsem (Rajya Sabha nung) peria mali. Züngsem peria ali asübo terenlok mapa kanga kera inyakla. Taruba anogotem nungbo Rajya Sabha nung tetsükdaktsü ajema akümtsüa akok. (Kechiyong) Congress party tashimaitba kümdar,” ta ashi.