June 20 aser 21, 2017 anogo Tir Yimyim olemsabang nung S.T. Yapang Lkr Kohima ajanga pei temeten jangjaba mapangji election ta züluba nung ajemdaker item onük ya kar jangja metetnua zülur

– Tiawati Jamir, Mid land Kohima,
Contact No. 7005168114

1. 1994 küm Obendanger, H.K. Sema-i Obendang agütsüba nung tongtibang kar yamai shia lir ta zülua aliba nung mezüngbuba onük nung Indian senso shia temzüngi melaba ama pei temeten vote aguja lir, aser aji shingaia bener aotsü makok. Aser iba tashi-ji yimsüsür mesüra lenir shingaia rakzüktsü makok ta shia lir. Sürabangla asen Ao lima yimtsüng kar nungbo Senso candidate shimer aser nüburtem pei temeten vote magüatsüdaktsüi yim ozüng agi alena ayur aser nisung ka mesüra anati dang yimer vote ajakji ajener. Iba ama mapaji yimtsüng kar nung tang aruya aliba election nung atalokra, nüburtemi kechi koda pei temeten vote ji ajentsü asoshi raratsü?, lenmang kar shidaktsüner.
2. Candidate ka mesüra telok mesüra nisung kari nübur aser nisung ka amokmerena lokti nungi jendoktsü, mesüra kin nungi jendoktsü ta shia temetenji ajemrepa yutsütsü merangra, parnokji ang meyiper nokdangtsü ta shia lir. Sürabrangla nisung ka mesüra anati iba yimten mesüra loktiji anema pei temeten vote ji agütsütsü asoshi nokdaktettsü lenmangji koda inyak nung ajungtsü, aser lokti mesüra yimtenji kechi koma ozüng agi alena ayutsü mesüra nokdangtsü? Kanga junga aser jangjajangja angatettsü asoshi tapet temzüng aser teinyaktsü kar lemsadaktsünur.
3. Yimsüsür shimba inyakyim nung nübur temeten rakzüktsübaji kecha pangdak aser tentet dak tashi mali, Putu menden, Senso Mongdang mesüra kechi nüngja südir sang, parnoki nübur nem tetuyuba agüja yimsüsür shimtsü tashi mali. Sürabrangla yimtsüng kar nung putu mesüra Senso Mongdang ajanga tetuyuba agüja nübur temeten ajemreprabang item yimsüsürtem mesürabang Senso Mongdangji kechi koma ozüng agi tapet temerenshi agütsütettsü, tongmelang agi rasaa shidaktsüner.
4. 7th June 2017 anogo nung Nagaland Chief Secretary-i election asoshi Indian temzüng ajanga telatet agütsüba nung ajemdaker tetuyuba aguja lir. Anungji iba tetuyuba nungji nisung ka mejeta yaritsü asoshi yim/kiyong/mesüra lokti tentet kati lemtetba nübur dang sangdongba ajakji linük temzüng nung aibelenba ta züngoker. Anungji item amaji asen Aor yim süngkümshi kar nung atalokra item lokti mesüra yim tanishir temji temerenshi tapet agütsütsü aser kechi koma temzüng nung ajemdaker parnokji temzüng nung aibelena inyakogo ta shitettsü? Yimlibilema nüburtemi jangjaa metettsü asoshi tapet ocet agi rasaa züludaktsünur.