June 3 nungi EVM hackathon tenzüktsü: Election Commission

May 20, 2017 nü New Delhi nung  ‘EVM Challenge’ onük nung osangbenertem senden metenzükdang Chief Election Commissioner, Nasim Zaidi dang EVMs aser VVPATs amshia sayuba noksa nung angur. 

New Delhi, May 20 (Agencies): June 3, 2017 nü nungi tenzüka EVMs raksaa sayutsü atema yimtenren party tem ayongzüker, ta tanü Election Commission-i sangdongogo.
Hopta ishika tejaklen yimtenren party temi, tawa assembly election nung amshiba Electronic Voting Machines (EVM) ji raksaa amshitsü akoker, ta aitsüba sülen tanü EC-i iba osang ya sangdonger.
“EVM raksaa amshia sayutsü atema June 3 nungi onoki ayongzüker,” ta Chief Election Commissioner, Nasim Zaidi-i tanü osangbenertem senden ka nung metetdaktsü.
Paisa, EVMs dak tamang makatetertemi tanü tashi nung EVM raksaa amshiba kuli magütsüteter, ta metetdaktsü.
Zaidi-i ashiba agi, EVMs nung aliba internal circuit ji melentsü khenyongi makoktsü.
“Onok indang EVMs nung technological features tajung lir aser raksaa amshitsü makok,” ta paisa ashi.
Paisa, election inyakyim nung temelenshi atema inyaktsüji stakeholders ajak teinyaktsü khuret lir, aser iba atema EC-i akokba tashi inyakdar, ta ashi.
Opposition party aikati, joko EVMs nung nüburtem tamang samaogo, ta jembir.
BSP aser AAP-ibo, tawa Uttar Pradesh, Uttarakhand, Manipur, Goa aser Punjab assembly election tem nung amshiba EVMs ji raksaa amshiogo, aser ibaji ajanga BJP ajangzükogo, ta aitsü. Iba sülen ano tanga party aikatia EC dang election nung EVMs masü saka paper ballots dang amshitsü takhangba agütsüogo.
Tamalen EC-i, taruba nungibo Lok Sabha aser assembly election ajak nung paper trail aketba EVMs amshitsü, ta nangzükogo.