June 4 nungi IG Stadium nung quarantine centre lapoktsü ; Paid Quarantine Centre nung amongtsü akok

Dimapur, June 3 (TYO): June 4, 2020 nungi Indira Gandhi Stadium nung quarantine centre lapoktsü. May 27 nungi IG stadium indang Multipurpose hall aser badminton court nung quarantine centre yangludar.
Iba quarantine centre nung nisung 470 shi ka mongtettsü aser metsümeshidak den nüngdakba ajak peria agütsütsü atema renemdar. Iba centre asoshi state sorkari achiajemtsü nungi tenzüker nüngdakba ajak agütsütsü.
Department balalai iba mapa nung yaritepdar aser ketdangsertemi anir kanga dang anibelema quarantine centre nung mapa inyakdar.
District Task Force-i iba centre ketdangsüa reprangtsü aser tangalen nungi arurtem lemsar mongdaktsütsü.
Mapa tajung kaji iba centre nung arogo balalai ‘Common Kitchen’ nung yariteptsüba lir.
Kohima Paid Quarantine Centres: Külen, Kohima Deputy Commissioner-i tanga sangdong ka nung Paid Quarantine Centres indang osang metetdaktsüogo.
Kohima Municipal Area kübok Hotel Vivor, Kohima, Hotel De-oriental Grand, Kohima, Hotel Eastgate, Kohima, Hotel Lavisto, Kohima, Hotel Millennium, Kohima, Hotel Grandeur, Kohima aser Hotel Holiday Oki, Kohima nung sen agüja Quarantine asütsü akok, ta pai ashi.
Tangalen nungi arurtemi D.Cs Office Kohima, Establishment Branch (ground floor) nung lapoka aliba Facilitation Centre nung Paid Quarantine Facility atema tenüng agütsütsüla.
Dimapur nung Reception/Screening Centre ajanga shirang mali ta kuli agütsürtem ang Paid Quarantine Centre nung mongdaktsütsü. Medical Officer-i agütsüba kulikaket bener ang Facilitation Centre-i arutsüla, ta Kohima DC-i metetdaktsü.
District Task Force, Kohima-i taktang reprangshimba sülen ang tamongdak lemzüktsütsü. Külen, Hotel ketdangsertemia chiyungtsü aser taktang nung amongba taa dalang agitsüla ta paisa ashi.
Paid Quarantine Facility nung amonger indang osangji Facilitation Centre-i CMO Co-ordination Team nem sangoktsütsüla.
Medical tsütsü tasüngdangnüba lira, Hotel kedtangsertemi Dr. Hoito Sema, Deputy CMO Kohima den tongteptsü akok.
Paid Quarantine Centre indang osang tali tejangjaba nung metetnürtemi War Room Kohima den office mapang tongteprateptsü akok, ta Kohima DC-i metetdaktsü.
Paid Quarantine Facility ya tangalen nungi Nagaland-i arurtem asoshi lir. Parnoki chiyungtsü aser anenzükba atema agütsütsüla aser sorkari lateta aliba SOPs aser tanga tetuyubatem sülen anidaktsüla.