Junga shisadanger sen tamshidak anentsü: RBI

New Delhi, Dec. 07 (Agencies): Bodbarnü Reserve Bank of India (RBI) Deputy Governor, R Gandhi-i, sen 500 aser 1,000 notes anentsütsü atema telemtetba agiba ya aritepa masü saka kanga shisadanga o lemteper agiba telemtetba ka lir, ta metetdaktsü.
Ita shia anaben amenba banks monetary policy senden amenba sülen osangbenertem den jembidang R Gandhi-i, “Sen tamshidak anentsüba telemtetba ya aritepa agiba masü. Nüburtem nem sen notes tasen billion 19 agütsüogo; ibaji tesüiba küm asem tsüngda onoki agütsüba den timba lir,” ta ashi.
Gandhi-i, “Onoki sen peria agütsütsü meranger. Onoki nüburtem dang tsübua marendaktsü mesüra sen rizünga mayutsü ajungshir. Nüburtemi digital payments amshitsüla, kechiyong iba atemaji lenmang aika lir,” ta ashi.
“RBI indang sen note printing press ajak mazüngi inyakdar, aser December 5 nü tashi nung sen lakh crore 4 bank tem nem agütsüogo,” ta paisa ashi.
Sen agi anünga mali ta shia Gandhi-i, “Tang tashi nung sen 500 aser sen 1,000 notes tejen lakh crore 12 banks nung deposit süogo aser timtem madoktsü atema sen tasen notes maneni agütsüdar,” ta metetdaktsü.
RBI-i sen 1,000 notes tasen adoktsü asü ? ta asüngdangba langzüdang pai, “Sen züngyaji nüburtemi nüngdakba apir adoker. Ibaji tesülen metettsü. Iba dak sentakba telemtetba agitsüa akok. Tang tashi nungbo iba atemaji telemtetba agia mali,” ta ashi.