Junger nii !!!! Lanlia !!!!

– T. Imo Jamir, Changtongya Yimtiba.

Tawato Mokokchungi atudang Ao-o nung adokba kaket kar alia azüngtsü atema ABAM Book-stall-i oa asen Aor Aotsürtemi züluba kaket ishika agizüker lushia züngdang.Mapang tatsüka nung Ao-o nung adokba kaket ishika rongnung ni kaket ana shimtet
1.ISREAL OTSÜ … Rev.A.Temjen Ao.
2.NAGA YIMTEN WADANG … Kibangwar Jamir.
Tsürapur Rev.A.Temjen.Ao shiba asen Aor Laishir rongnung Tejen Lai Putishir ka liasu pai züluba ISRAEL NUNGER OTSÜ kaket mapang balala nung adokba kaket tilala ishika arokoteper kaket ka küma atokba kaket tenüngji “ISRAEL OTSÜ” ta sür adoka lir.Yamala kaket tezülur kati züluba benteper kaket ka küma atoktetbaji kanga junger, kechiaser nüngdak mapang tejen kaket ana/asem bushitsübaji mapati saka kaket ka aliba jagi ajak peridaktsür.Asen Aor Aotsüri züluba kaket aika rongnung tangazüktsü aketba aser jangratema otsü atongteper ama azüngbaji Lai Putishir Dr,Rev.I.Ben.Wati-i züluba kakettem ta shitet.Pai züluba kakettem ni metetba tashibo alia züngogo, pa ano taküm junga ali asübo tanüa pai züluba kaket tasen-tasen alia zünga lila ta sasaa bilemer.Pa meliaka pai zülua toktsüba kakettem azüngdang pa bilemteter.Dr.Rev.I.Ben Wati-i züluba kakettem to arokoteba adianu kinunger kari anepalua kaket tuluka kümer atoktet asübo kangasa jungla.Pai züluba ocettem magazine aser bulletin balala nung adokbatembo mependenmatsü südi.Aji oda kaket ajakto benteper kaket ka küma atoktet asubo kaket azüngertem atema pa taküm ali ama ken asentenshia temoatsü ngula, kechiaser pai züluba keket nung tagitsü aikasa züluoka lir.
Odila KIBANGWAR JAMIR (Chuchuyimpang)-i züluba kaket,”NAGA YIMTEN WADANG” ya kangasa apensaa züluogo ta azünger.Iba kaket tereprangtsübo apuapur tilaka dang saka iba kaket nung tagitsübo nangtena lir.Nagalima yimten nung ataloka arubatem ajak meteta aser angashia liaka item tatalokbatem kodang, koba tesem nung atalok aser shir tendak atalok ibala ajakbo jangjaa metetet liasüba, iba kaket nung tatalokbatem kata mezütoki tatongi tejangja zülua aliba jagi otsütemji tejangja metetba dang masü saka yasüra onük aika nung amshitetba kaket ka ta shitet.
“KILANGJANGPOK TOM NUNG POKTET AMA” Odila Kibangwar atura tashikawa tepiyong Sorkar tenzükba nung lia arur tang anisüngzükba mapang kecha mebilemi lia iba ama tabensa kaket zülua nuportem nem züngdaktsüba atema kanga pelar ta shisemer. Naga nunger yimten wadang, tebilemtsü, khuret aser teinyaktsü nung ajemdaker züluba kaket aikasa züngdangogo saka itemla kaket teimbaka kaket züluri pa atenba telok, pai saklokba telok aser pa sentaktepa aliba teloki inyakbalenang janga züluba angutsü. Item kaket jagi nübortem tzüraba aser taginüba tzüratema mataloktsür, oda kaketji züngazünga tezüang tangdaktsür saka koba kaket KIBANGWAR-I züluba lir, iba kaket alia azüngba ajanga asen Naga nunger libaliroa aruba aser yimten nung tatalokbatem ajak tejangja metettsü. Ajaki iba kaket alia azüngtsü ayongzüker. Oda nai mezüngnura tejangrar kar nem alia züngdakjang. Iba kaket ya shinga luja masü mesüra tujaa masü aser kaket nungji nangloknangra kecha inoksema mali saka indang-indanga kechisa atalok akata mezütoki züluba kaket lir.Yimten(Political) nung ajemdaker züluba kaket iba ama teindang kaket aikabo mangutsü.
Tanabena ken lepshir, Dr.Rev.I.Ben Wati-i züluba kakettem nung akhi tsürapur libaliroa aruba aser Ao kaket ken-o puti aika zülua alinung kinunger adianu kari kakettemji arokotena kaket tuluka küma pai koma zülua ali (original script) ajioda atoktet asübo koda jungla. Pai züluba kakettem kodang züngdir züngazünga kaket azünger ama masü saka pa den asetteba mener otsü atonger ama ang yimdangi arur.
Dr.Rev.I.Ben Wati-i temalen züluba kaket ishika nung tasüngdangba kar züngshi saka tanü tashi iba telangzüba shingaia züluba mangur, anungji nia kanga metetnü nung yangia ken lepshir :
1. Akhi longsowa nungi asen tsürapurtemi “AO YIM SEMER-NA’ ta jembia aru, sura item yim semerji koyimer sa asütsü amai ?
2. American Missionary-tem asen limai marudang Aor tenüng “ZÜLU” ta amshia ajaba karbo liasü asü mali asü ? Tat:Temjenzülu, Kikumzülu, Imtizülu, Lemdongzülu, Merenzülu, Imrongzülu, Zülujiba, Zülutemba, Züluangla, Zülumongla, Zülutoshi amala….. (ZÜLU ta asüba olong ya Ao o tasen asü, tejen ta metetnürba ako…..)