Jungjunga bushisüngdangbaren

Nagaland nung gari totzü nung kerosene enoker ayokba maparen bushisüngdangtsü asoshi state government-i Special Investigation Team (SIT) ka shimer inyakdaktsüba nung ACAUT teloki temulung melemtetba agi, parnokisa tangar lokti tentet aika ayongloker Coordination Committee on Fuel Adulteration (CCoFA) tentet aser iba telok tenüng amshia kasa maparen ya SIT nem masü saka CBI nem bushisüngdaktsütsüla ta takangba agüja longkak aitba asenoki angashiogo. Atangji, ACAUT teloki dang masü saka Naga nungertemi Nagaland government-i shimba SIT telok dakji temulung malemer. Ibaji state government nung yimsüsürtem asoshi dang masü saka Nagaland police asoshi tebilemdangtsü tuluka asütsü. Aji oda, nübortemi mitkartem dak temulung melemtetra iba lima aser yimtijibo tetsübu aser shisabolu agi sünga lir, kechiyong iba lima aser yimtiji tsükchirtem ket nungi kümzüka mali. Ibaji mesüka tanü asen lima nung ozüng raksartem ket nungi asen lima aser lokti kümzüka ayutsüba telokji mitkar (police)-tem lir, ajisüaka nübortemi parnok dak temulung melemtetra mitkartemji kecha nüngdak mali akümer. Aji oda, tamalen atalokba mapatem ajak yutsür tanü tang atalokba mapa kaji gari totzü ayokertemi parnok talila ajangzüktsü asoshi gari amshirtem külakoktsüba mapa ya asütsü. Atangji, parnoki gari nung kerosene enoker amshidaktsüba agi gari raksaba jenjangji sen crore aika asütsü. Shitakba agi, gari akartemi Consumers court nung iba ama ken o benoka jembitsüla aser temenok meshitsüla. Ajisüaka, asenok dak iba amaji asenok külakoktsüba mapatem anema inyaktsüba tangatetba aser shisatsü mali. Iba jagi ola madoker aser aremzüker. Ashiko, tawa Dimapur nung gari totzü nung kerosene meyokteper ayokba mapatem putetba tobo tangbo amadoker kasa totzü enokdak kasa yimya to amshia enoktsüdar asütsüa akok. Iba amaji tsümar totzü ayoker ishika nem Naga nunger mezüngmeshi mesüdaktsütsü aser makoksadaktsütsü asoshi CCoFA teloki CBI jaoka tatem tashi bushisüngdangdaktsüner. Atangji, state government ali tashi CBI jaoka bushisüngdaktsütsü melatsübaji temela masü kechiyong iba jagi state police dak state government-i temulung melemtetba sayur asütsü. Ano, ibaji dang masü saka state government nung alirtemi aibelenba mapa ka CBI nem bushisüngdaktsütsübaji state government-i memelatsü. Ibayongji, CCoFA teloki National Highway nung government gari mesenzüdaktsüi nokdanga longkak aityonga makok state government-i ashiba nung haihaura kaa temogo. Atangji, SIT telok jagi nangzükba ama ochimulung agi ajak külem ajangzüktsü mechi nung gari totzü meshitak ayokba mapatem ajakji jungjunga bushisüngdanger aibelenba mapatem ajak puteta metongshitetra junger, kechiyong nübortem taginübaji ibaji lir. Ano, CBI jaoktsü memulungaka Chief minister Dimapur tashi tonga aluagi CCoFA purtem ajurutepa nübortemi temulung achitsüsa SIT teloki inyaktsü nangzükbaji junga inyakogo ta bilemer. Ibaji state government-i nübortem tonga oagi parnok jashiba aser taginüba angadangba mapa ka asütsü. Ajisüaka, tekümdangtsü kaji aiben state government-i nübortem dang nangzükba mapatemji nübortemi mamai mita melira amadoker aser mapa küma meinyaker. Shitakba agibo gari totzü meshitak ayokba mapatem ya tatem tashi bushiang aser meshitak ayokertem puoka yuang ta nübortem longkak aita belemtsü menüngdaker. Aji oda, ashikülaker puang aser ozüng raksartem merenshiang ta nübortemi longkak ait nung dang government tera arakzütsübaji tim masü. Aji oda, government liaka nübortemiang ashikülaker mapa puteta agütsüba aser item dakji tapet temerenshi agüjang ta longkak aitba jagi government nung alirtemiang ozüng raksar aser parnokiang ozüng raksar pu asemer amai sayur. Atangji, nübortem ashiokja senotsü tajangzük bushirtemji parnok kija masü saka sorkar nung alirtem den kasa tajangzükji lemsaa alitsüa akok, iba jagi sorkar nung alirtembo kangabo mejashir südi. Ajisüaka, government nung alirtema joko ochimashi mapa inyaka nübortem ojang akoksadaktsütsüla aser nübortema pei temeten meteta ola adokba senso kaka asütsüla. Iba amaji asünungdang SIT telokia shitak inyaktsü.