Jungtepshia liang

Tenladak madak ne tenla tokjang aser oang, aser tamasa ne adianu den jungtepang, ajiser arung aser ne tenla agüjang. Mathi 5:23,24.

Ne adianutem den tsükchitepa yur tenla agütsübaji tagizüktettsü tenla masü. Yisui Pa sülen anidakertem dang kar anema langka ta lira parnok den jungtepang ta ashi. Alima telemtetba ka yur jungteptsü bushir Khristantemi kechi südir süaka jungteptsüla.

Nenoki ashir, “Saka nenoki ashir pai ni koda yirutsü nai memetet! Onok tesendaktep jungshiteptsü kuli maka.” Mesüra, “Ni merangogo saka lai au masü.” Jungtepba alitsü asoshi Yisui talila o meinoki. Ne tsükchir dang meimang ta dang Yisui ashi (Matt. 5:44). Pai na rishikangshira pa dang meimang. Pa atema sarasademjang ta dang ashi (Matt. 44). Yimjak nung na mak südaktsüra nai meyipa telangzü (t. 39). Kari ne dang langka meshira talila agüjang (t.41). Alimai sayur “Na atema liang.” Yisui sayu, “Ne sasa tila kümang.”

Na ajemzüktsütsü ta alimai tekümdangtsü agütsür. Yisui Pa nütsüngtem dang junga benshitsüla ta mebilem saka parnoki ajak den jungtepa alitsü bilemtsü. Nisungi pa dak metsü metsüloktsü aser kangki nung angenlok.  Pai kechi langzü aji asenok yimya (model) lir: “Oba, parnok dang tai tokang, kechiaser parnoki kechi inyaker aji parnoki memetet (Luke 23:34).

Idakji maneni ozüng raksaba lira aser tashi mangaba lira, ibaji jungteptsüla. “Ni mapatem shidak inyaktsü meranger, saka kü tsükchirtemi magizüker” ta asen sasa bilema asenoki tiplema alir. Tsüngrem Oi “Jungtepba alitsü merangang” ta mashir saka, “Jungtepang” ta ashir. Kar den na yimjung nüngdaka lir asü? Süra Tsüngrem ashiba ama inyakang.