Jungtepshiba Terenlok

Kü atangji süngra ka nung apuba, nai item tetsür dang yariang ta ni ne dang mepishir. Fil. 4:3
Alimaji tesüngmangtsü tapu balala agi sünga lir. Balala jagi Tsüngremer teyangluba sünga lir. Pai Pa chirtem nem tereprangtsü balala, oshi balala aser yimya balala agütsü. Balalaji tajung.
Aji saka ken-ken balalaji tenokdangba jara akümer. Külemi aintsü melen meputep adoker, rarapangsenang adoker.
Paul den külem inyaker ana tsüngda nung Filipi nung osangtajung sayutsüngiba nung obang mapu adok: Eudoia aser Syntyki tsüngda nung. Tanü kasaji Khristantem rongnung obang mapu adoker.
Kasaji Kotaker Tebui Filipi nung Paul  ajanga inyakba ama tanü asenok den jembir. Tebilemtsü nungji asenoka shilem ka asütsü asenoki memelunger. Idakji ka tsütsü atentsü mesüra nüngsen taklang mali, tai agütsü mesüra miim mapa inyaktsü taktang mali. Kodang külem tsütsü dang atsüngdir mesüra miim sensaksem lidir jungtepshitsüba lemangji makai akümer. Jungtepshiba mapa koba agi raksatsür iba bentettsüba nung asenoka shilem ka asütsüla. Telungjem aser tesendaktep raksatsüba jara raksatsür rongnung asenoki shilem agitsüla. Timtem adoktsür dang iba mapa teinyak ta ashitsü asenoki tasü maiter. Tsüngremi asenok meimba aser Yisu Khrista nung tatok agütsüba osang tajung lemsatepba nung asenok ajak shilem agitepertem lir.
Kibuba Yisu, onoki osangtajung nung külemi shilem agirtem asütsü asoshi onok tsüngda balala lemsatepba anebjangma. Amen.