Just A Venue: Kong nüburtem anisüngzüka kazür

Mokokchung, Sep 19 (TYO): Asenok meimchir taküm ya mapa kisüng inyakba mesüra kidang dang moka kazüba agia alaker, anungji, khenkhenbo sodi mapang pei kibong/chirnurtem anir mesüra medemertem den yimdongi oa meta repranga aser tangu sadoka kazütsübajia kanga nüngdaker.
Aji oda, Mokokchung nung tang aikati sapua jembiba tesem kaji; “Just A Venue” ya lir. Iba tesem ya aikati meteta lir aser ano aikati memetettsü südi. Kechiyong iba ya lapoker kanga talangkabo masü. Iba tesem ya nüburtem asoshi tangu sadoka kazüdak tesem tajung ka lir.
‘Just A Venue’ nung “hau” junger ta asütsüsa yangji tepuatsü/tenükshitsü tapu aika lir. Iba tesem nung ya tangu sadoka kazütettsü akok aser sati benjong, party, kentenmenü sentong, sentep, lokti senden, shisadokten, family outing, picnic, yamaji kija aser lokti balalai nüngdak balala nung amshitettsü. Tajung kaji iba tesem tonga gari iteter aser gari anendaka sademsadema lir.
Jangratemtsü kaji iba tesem “JAV” ya temenungratsüka süngdonglidong agidang mekütbanga lir, aser mopung kanga tanep aser ayong tzü peria angur. Yangji swimming pool tanur-tain atema yanglua lir. Süngdong ki (tree houses) balala yanglua lir. Sorochiokdak ki balaka lir aser chiyungba tesema lir, sound system, projector, chipo-aonpo, metsü-meshidak, kazüdak akhüm (lounge), tila tanurtem asayaa kazüdak aser jilia dang shirbo asenoki nüngdakba tapu ajak parnoki anepalutsür.
Iba osangbeneri Just A Venue kibur Sp. Moachuba Longkumer den sensaksemdang, pai ashiba agi iba tesem ya sorkar teyari kecha magii yangluba lir, ta ashi.
Mokokchung nung iba amai tangu sadoka kazüdak tesem nüngdakba ajiteta ibai yangluogo aser tongtibangsa sorkar aser tsürabur dak meimlai pei sasa mapa meranga inyaka chiajema alitsü nükjidong yur iba mapatong ya tenzükba lir, ta paisa ashi.
Tarutsü nung tebilemba karbo lir mali? ta metetnüa asüngdangdang, “iba tesem ya kazüdak tesem ka dang masü saka raliwalir/lima penzüa jajartem asoshi tepuatsü tesem (resort) ka amai kümdaktsütsü kü mangdang lir”, ta paisa inyaka aotsü sentong kar lemsatep.
Nisung kari danga iba tesem semdangnüra iba mobile number (9089215583/8259922817) nung tongteprateptsü akok. Iba tesemi arur shia senpak 100/- (entry fee) agir saka tila tanurtembo sen magir. Iba tesem ya Hombar nungi Honibar tashi lapoker aser Deobarnübo nikongdang 1:00 ako nungi dang lapoker.
JAV ya Mokokchung yim lushi nung lir. Iba tesem ya Mokokchung town nungi kilometer 5 shi pilar lir aser Amguri National Highway nungibo kilometer ka shi dang air. Iba tesem ya Amguri lenmang nung taoba mapang Tzüsabang police check gate aliba aser Tuensangi aoba lenjem nungi air.
Just A Venue moudanger kar ali asü? Nai khen semdanger külen dang metettsü. Anungji, pei kibong aser medemertem ayongteper yakta semdangang. Nai ano tanabena onütsü.