Justice L.S. Jamir-i takoksa ajuruba tetsür ana nem sen teyari agütsü

Dimapur, July 4 (TYO): July 2, 2017 nü Gauhati High Court Judge aser Nagaland State Legal Services Authority Executive Chairman, Justice L.S. Jamir-i tashiyim agi raksatsür tetsür ana nem sen lakh ka ka teyari agütsü.
Gauhati High Court Kohima Bench nung pa indang office chamber nung Justice L.S Jamir-i Nagaland Victim Compensation Scheme, 2012 kübok takoksa ajurur nem sen teyariji agüja liasü.
Iba onük atema Nagaland State Legal Services Authority aser Panel Lawyer temi mapa tajung inyakba atema Justice L.S. Jamir-i parnok dang pelaba metetdaktsü aser paisa civil society tem dang loktiliba nung takoksa ajururtem metettsü aser yaritsü atema tayongzükba agütsü.
Sentong nung Southern Angami Women President, Lekhono Lese-ia takoksa ajurur ana nem sen teyari agütsüba atema Nagaland State Legal Services Authority dang pelaba metetdaktsü.
NSLSA Panel Lawyer, Neiteo Koza-i iba ken o ana atema mapa inyak aser lai ashiba agi, Kohima District Legal Services Authority-i January 2017 nung Relief and Rehabilitation Department dangi teyari agütsüba indang tebilemba lemsatep.
Nagaland Victim Compensation Scheme, 2012 kübok lendongtsüdong balala nung takoksa ajurur nem senotsü agütsütsü lateta lir. Taküm lalur nem sen lakh 2, temang nung shilem 80 dak tema lemtatsüsa takoksa ajurur nem sen lakh 1, temang nung shilem 40 dak tema lemtar nem sen meyirjang 75, tashiyim agi shi nung medemba tetsür tanur nem sen lakh 1 aser tashiyim agi shi nung medemba tetsür nem sen meyirjang 50 teyari agütsür, ta Neiteo Koza-i metetdaktsü.
Laisa ashiba agi, temang nung shilem 40 dak teküpok lemtar nem sen meyirjang 75, nisung shibelenba nung takoksa ajurur nem sen lakh 1 aser tanur nem sen meyirjang 20 teyari agütsütsü.