Justice LS Jamir-i panel lawyer tem dang sempet memeshitsü ayongzük

Kohima, Monupii (May) 29 (TYO): Gauhati High Court nung Judge, Justice L S Jamir-i State legal services authority kübok aliba panel lawyer temi nübortem ket nungi sempet kecha memeshitsü atema tayongzükba agütsü.
“Nagaland State Legal Services Authority (NSLSA) kübok panel lawyer temi nüngdakbapurtem aser sensakertem yaritsüla aser parnok nem angati legal services agütsütsüla” ta tanü ATI nung refreshers training agidang Justice LS Jamir-i ashi.
Panel lawyer tem ya makamaitertem aser ozüng atema teimla lir. Nenoki nüngdakbapurtem indang khuret angatettsüla aser ochi obendang agütsütsü atema okadak parnok atema kuli tajung agütsütsüla, ta paisa ashi.
“Panel lawyer temi Legal Services Authority indang mapa tongti inyaker aser nenoki nübortem aser ozüng tsüngda apu latsür ka ama shilem agir” ta paisa shisem.
Justice LS Jamir ya NSLSA nunga Executive Chairman lir aser pai ashiba agi, iba training ajanga panel lawyer temi loktiliba nung tangar memenepertem asoshi legal services tajungba inyaktsü imlar.
Sentong nung NSLSA Member Secretary, Mezivolu T Therieh-i okila jembidang, panel lawyer tem atema anogo ananü refreshers training agiba ya talila angazüktsü aser legal services tajungba agütsüdaktsütsü atema lir, ta ashi.
“Asenoki jakdang Legal Services Camps, Legal Literacy Club, Artificial intelligence, Victim Compensation schemes, human trafficking tebilemtsü, Women & Children rights, Lok Adalats, jails aser tanga onük aika lir aser item tayongzükba ya legal awareness nungi legal empowerment tashi lir” ta laisa ashi.
“Asenok ajak külemi longjemer sentongtem atongtsüla aser nüngdakbapurtem ajangzükdaktsütsü atema asenoki inyaktsüla” ta Mezivolui-isa ashi.
Iba training nung district balala nungi panel lawyer 40 shi adener aser training ya asüng tembangtsü.